افریقی ملک نائیجر نے تنازعات بڑھنے پر امریکا کے ساتھ فوجی تعلقات معطل کرنے کا اعلان کر دیا ہے۔غیرملکی میڈیا رپورٹس کے مطابق نائیجر فوج کے ترجمان کرنل میجر امادو عبدالرحمان نے کہا ہے کہ واشنگٹن کیساتھ فوجی تعاون معطل کر رہے ہیں اور ملک میں امریکی فوج کی موجودگی اب جائز نہیں ہے، حالیہ ہفتوں میں ہماری سرزمین پر امریکی پروازیں غیر قانونی تھیں، حکومت نے امریکی فوجی اور سویلین ملازمین کے متعلق معاہدہ فوری ختم کرنے کا فیصلہ کیا ہے۔واضح رہے کہ نائیجر فوج کی جانب سے امریکا کے ساتھ فوجی تعلقات معطل کرنے کا اعلان ایک سینئر امریکی وفد کے نائیجر سے روانہ ہونے کے ایک دن بعد سامنے آیا ہے، امریکی وفد نائیجر کی فوجی قیادت کے ساتھ رابطوں کی تجدید کیلئے تین روزہ دورے پر موجود تھا۔نائجر افریقی ساحلی خطے میں امریکی فوجی کارروائیوں میں مرکزی کردار ادا کرتا ہے اور یہاں ایک بڑا فضائی اڈہ ہے، امریکا کو اس خطے میں تشدد کے پھیلا ئوپر تشویش ہے، جہاں مقامی گروہوں نے القاعدہ اور داعش کے شدت پسند گروہوں کے ساتھ وفاداری کا عہد کیا ہے۔امریکی فوج نے حالیہ برسوں میں نائیجر کے شہر اگادیز میں ایک بڑے ہوائی اڈے کو چلانا شروع کیا جو دارالحکومت نیامے سے تقریبا 920کلومیٹر دور ہے، اڈے کو انسان بردار اور بغیر پائلٹ کی نگرانی کرنے والی پروازوں اور دیگر کارروائیوں کیلئے استعمال کیا جاتا ہے، امریکا نے نائیجر کی فوج کی تربیت میں کئی سال اور کروڑوں ڈالر کی سرمایہ کاری بھی کی ہے۔نائیجر میں اب بھی 10کروڑ ڈالر کی لاگت سے بنائے گئے صحرائی ڈرونز کے اڈے پر تقریبا 1000فوجی تعینات ہیں، جولائی 2023 کی بغاوت کے بعد سے وہاں نقل و حرکت محدود ہے اور واشنگٹن نے حکومت کی مدد کو روک دیا ہے۔

کریڈٹ: انڈیپنڈنٹ نیوز پاکستان-آئی این پی