امریکا کے شہر ڈیلس میں امیگریشن اینڈ کسٹمز انفورسمنٹ (آئی سی ای ) کے فیلڈ آفس اور حراستی مرکز پر فائرنگ کے واقعے میں 2 قیدی ہلاک اور ایک زخمی ہوگئے۔ مقامی اور وفاقی حکام کے مطابق حراستی مرکز پر فائرنگ کرنے والے حملہ آور نے بعد ازاں خود کو گولی مار کر خود کشی کرلی۔ڈیلس پولیس کے مطابق صبح تقریبا 6 بج کر 40 منٹ پر شمال مغربی ڈیلس میں واقع آئی سی ای آفس کے قریب فائرنگ کی اطلاع ملی۔ ابتدائی تحقیقات میں بتایا گیا کہ مشتبہ شخص نے قریبی عمارت سے دفتر پر فائرنگ کی۔فائرنگ کے بعد2 زخمیوں کو اسپتال منتقل کیا گیا جبکہ ایک شخص موقع پر ہی ہلاک ہوگیا، بعد ازاں زخمیوں میں سے ایک قیدی ہلاک ہوگیا۔امریکی محکمہ ہوم لینڈ سکیورٹی کی ترجمان ٹریشیا میک لافلن نے کہا کہ آئی سی ای کے کسی اہلکار کو نقصان نہیں پہنچا۔ترجمان نے مزید کہا کہ واقعہ ایک فیلڈ آفس میں پیش آیا، جہاں حال ہی میں گرفتار افراد کی مختصر مدت کے لیے کارروائی اور دستاویزات مکمل کی جاتی ہیں۔ مقامی میڈیا کے مطابق اس وقت متاثرین کو پروسیسنگ اور ملک بدری کیلئے عمارت میں لے جایا جا رہا تھا۔فاکس نیوز اور دیگر مقامی میڈیا کی رپورٹس کے مطابق حملہ آور کی لاش قریبی رہائشی عمارت کی چھت پر ملی، اور امکان ہے کہ اس نے اسنائپر رائفل کے ذریعے فائرنگ کی۔

کریڈٹ: انڈیپنڈنٹ نیوز پاکستان-آئی این پی