ایران نے اعلان کیا ہے کہ اگر امریکا نے یورینیم افزودگی بند کرنے پر اصرار کیا تو جوہری مذاکرات نہیں ہوں گے۔ایرانی سپریم لیڈر آیت اللہ علی خامنہ ای کے مشیر علی ولایتی نے سرکاری خبر رساں ادارے ارنا سے بات کرتے ہوئے کہا ہے کہ اگر مذاکرات کی شرط افزودگی بند کرنا ہے، تو ایسے مذاکرات نہیں ہوں گے۔یہ بیان ایسے وقت میں سامنے آیا ہے جب ایرانی وزارت خارجہ کے ترجمان اسماعیل بقائی نے کہا کہ فی الحال امریکا کے ساتھ کسی ملاقات کی کوئی تاریخ، وقت یا مقام طے نہیں ہوا۔یہ ممکنہ ملاقات ایران کے وزیرخارجہ عباس عراقچی اور امریکی ایلچی اسٹیو وٹکوف کے درمیان متوقع تھی۔واضح رہے کہ رواں سال اپریل سے ایران اور امریکا 5 بار مذاکرات کی میز پر بیٹھے لیکن کسی حتمی معاہدے تک نہ پہنچے۔ یہ دونوں ممالک کے درمیان 2018 میں امریکا کے جوہری معاہدے سے دستبردار ہونے کے بعد کا سب سے اعلی سطحی رابطہ تھا مگر اسرائیل کے اچانک حملوں نے ان مذاکرات کو روک دیا تھا۔جنگ کے اختتام کے بعد دونوں ممالک نے بات چیت کی بحالی کا عندیہ دیا ہے، لیکن ایران نے واضح کیا ہے کہ وہ جوہری توانائی کے پرامن استعمال کے اپنے حق سے دستبردار نہیں ہوگا۔

کریڈٹ: انڈیپنڈنٹ نیوز پاکستان-آئی این پی