جاپان کے مختلف حصوں میں طوفان کے باعث شدید برف باری کا سلسلہ جاری ہے ، برفباری سے ایک شخص ہلاک بھی ہوا ہے ،غیر ملکی میڈیاکے مطابق جاپان میں ریکارڈ برفباری ، حکومت کی جانب سے وارننگ جاری کردی گئی ، ٹوکیو میں رواں سال کی پہلی برف باری ہوئی، جاپان کے شہر منی وا میں 24گھنٹوں کے دوران ریکارڈ 36انچ برف پڑی ہے جبکہ کوسا میں بدھ کی صبح درجہ حرارت منفی 9ڈگری سینٹی گریڈ ریکارڈ کیا گیا، شدید برفباری اور طوفان سے نظام زندگی درہم برہم ہو گیا اور لوگوں کو مشکلات کا سامنا کرنا پڑرہاہے ، وسطی جاپان میں برفباری کے باعث ٹریفک کی روانی متاثر ہوئی اور گاڑیاں ، ٹرک کافی دیر تک سڑکوں پر پھنسے رہے ،جاپان کے شمالی حصے میں ڈومیسٹک ایئر لائنز کی 300سے زائد پروازیں منسوخ ہو گئی ہیں جبکہ حد نگاہ متاثر ہونے سے بلٹ ٹرین سروس بھی معطل اور تاخیر کا شکار رہی،جاپان کے محکمہ موسمیات نے پیش گوئی کی ہے کہ ملک کے کچھ حصوں میں جمعرات(آج)تک درجہ حرارت مزید نیچے گرسکتا ہے جو کہ صدی کا سب سے کم درجہ حرارت ہوسکتا ہے ،جبکہ مغربی جاپان سے شمالی جاپان تک برف باری کا سلسلہ جمعرات (آج) تک جاری رہنے اور 126کلومیٹر کی رفتار تک ہوائیں چلنے کی پیش گوئی کی گئی ہے ۔

کریڈٹ: انڈیپنڈنٹ نیوز پاکستان-آئی این پی