جاپان کی مشہور اور مصروف ترین بلیٹ ٹرین سروس اس وقت متاثر ہوئی جب ایک سانپ نے بجلی کی لائن کے گرد لپٹ کر پاور سپلائی میں خلل پیدا کر دیا۔ اس واقعے کے بعد تقریبا پانچ بج کر 25 منٹ پر ٹوکیو اور اوساکا کے درمیان چلنے والی ٹوکاڈو شنکانسن ٹرینوں کو معطل کر دیا گیا۔ بی بی سی رپورٹ کے مطابق ٹرینوں کی معطلی کا اثر خاص طور پر گولڈن ویک کے دوران محسوس کیا گیا، جو جاپان کی سالانہ تعطیلات کا سب سے مصروف سیزن مانا جاتا ہے۔ اس ہفتے کے دوران لاکھوں افراد سفری سہولیات سے فائدہ اٹھاتے ہیں، جس میں ٹرین سٹیشنز، ایئرپورٹس اور سیاحتی مقامات پر غیر معمولی رش دیکھا جاتا ہے۔ سانپ کی موجودگی کا واقعہ گیفو ہاشیما اور مایبارا سٹیشنز کے درمیان پیش آیا، جس کے باعث ٹوکیو جانے والی ٹرینیں شِن اوساکا سے ناگویا تک اور اوساکا جانے والی ٹرینیں شِن اوساکا سے ٹوکیو تک معطل رہیں۔ تقریبا ڈیڑھ گھنٹے بعد شام سات بجے کے قریب سروس کو بحال کر دیا گیا۔ بجلی کی بحالی کے دوران متعدد مسافروں نے سٹیشنوں پر عملے کے گرد ہجوم لگا لیا، جب کہ ٹکٹ مشینوں پر طویل قطاریں دیکھنے میں آئیں۔یہ پہلا موقع نہیں کہ سانپ نے شنکانسن سروس کو متاثر کیا ہو۔ اپریل 2024 میں بھی ایک سانپ کی موجودگی کی وجہ سے ناگویا اور ٹوکیو کے درمیان 17 منٹ کی تاخیر ہوئی تھی۔ اس وقت ایک 40 سینٹی میٹر کا سانپ ٹرین میں گھس گیا تھا۔

کریڈٹ: انڈیپنڈنٹ نیوز پاکستان-آئی این پی