آل انڈیا کانگریس کمیٹی (اے آئی سی سی )کے دو روزہ اجلاس کے اختتام پر ایک سخت قرارداد منظور کی گئی جس میں مودی حکومت کی خارجہ پالیسی کو شدید تنقید کا نشانہ بنایا گیا ہے۔بھارتی میڈیارپورٹس کے مطابق قرارداد میں کہا گیا ہے کہ مودی حکومت نے شخصی تشہیر اور ذاتی مفادات کو قومی پالیسی پر ترجیح دی، جس کے نتیجے میں بھارت کو عالمی سطح پر شرمندگی کا سامنا کرنا پڑا۔ خاص طور پر مودی اور ڈونلڈ ٹرمپ کی واشنگٹن ملاقات پر اعتراض کیا گیا، جس میں ٹرمپ نے بھارت کو "ٹیرف ابیوزر" کہہ کر توہین آمیز الفاظ استعمال کیے۔قرارداد میں کہا گیا ہے کہ بھارت اور امریکہ کے تعلقات اہم ہیں، مگر ان تعلقات کو قومی مفادات کی قربانی کے ساتھ قائم نہیں کیا جانا چاہیے۔ حالیہ مہینوں میں امریکہ نے بھارتی برآمدات پر 26 فیصد اضافی ٹیرف عائد کیا ہے، اور اس کے جواب میں اگر بھارت نے درآمدی ٹیکس کم کیے تو اس کا نقصان کسانوں اور مقامی صنعتوں کو ہوگا۔بھارتی تارکین وطن کے ساتھ امریکہ میں ناروا سلوک پر بھی قرارداد میں تشویش کا اظہار کیا گیا، جنہیں زنجیروں اور ہتھکڑیوں میں جلاوطن کیا جا رہا ہے۔

وزیر خارجہ ایس جے شنکر کے امریکی حکومت کی حمایت میں دیے گئے بیانات کو توہین آمیز قرار دیا گیا۔قرارداد میں مزید کہا گیا کہ مودی حکومت چین کو "لال آنکھ" دکھانے کا دعوی تو کرتی ہے، لیکن براہم پترا دریا پر ڈیم اور لداخ میں 2000 کلومیٹر زمین پر قبضے جیسے اہم معاملات پر مکمل ناکام رہی ہے۔بنگلہ دیش میں شدت پسندوں کے بڑھتے ہوئے اثر و رسوخ اور فلسطین اسرائیل تنازعے پر مودی سرکار کی خاموشی کو بھی شدید تنقید کا نشانہ بنایا گیا۔ قرارداد میں آر ایس ایس اور بی جے پی پر بھی شدید تنقید کرتے ہوئے کہا گیا کہ یہ وہ جماعتیں ہیں جنہوں نے تحریک آزادی، خاص طور پر کوئٹ انڈیا موومنٹ کی مخالفت کی تھی، اور اب حب الوطنی کے جعلی سرٹیفکیٹ بانٹ رہی ہیں۔کانگریس نے اپنے نظریے کی وضاحت کرتے ہوئے کہا کہ ان کے نزدیک قوم پرستی کا مطلب عوام کو جوڑنا ہے، نہ کہ نفرت کے ذریعے تقسیم کرنا۔راہول گاندھی نے اعلان کیا کہ ضلعی کانگریس کمیٹیاں (DCCs) پارٹی کی بنیاد بنیں گی اور انہیں اختیارات دئیے جائیں گے۔ جنرل سیکریٹری کے سی وینوگوپال کے مطابق گجرات میں 15 اپریل اور راجستھان میں 20 اپریل تک ڈی سی سیز کی تشکیل مکمل کر لی جائے گی۔

کریڈٹ: انڈیپنڈنٹ نیوز پاکستان-آئی این پی