سعودی عرب کے فرمانروا خادم الحرمین الشریفین شاہ سلمان بن عبدالعزیز نے بارانِ رحمت کے حصول کیلئے آج 12 فروری(جمعرات) کو مملکت بھر میں نمازِ استسقا ادا کرنے کی ہدایت جاری کر دی ۔شاہی فرمان میں مسلمانوں کو تلقین کی گئی ہے کہ وہ اللہ تعالی کے حضور عاجزی اور انکساری کے ساتھ دستِ دعا بلند کریں تاکہ ربِ کریم اپنی رحمتوں کی بارش نازل فرمائے۔اعلامیے کے مطابق مسجد الحرام اور مسجد نبویؓ سمیت سعودی عرب کی بارہ ہزار سے زائد مساجد میں نمازِ استسقا ادا کی جائے گی۔اس موقع پر ائمہ کرام خصوصی دعائیں کریں گے اور امتِ مسلمہ کی اجتماعی مغفرت، رحمت اور خیر و برکت کیلئے بھی دعا کی جائے گی۔شاہ سلمان نے عوام پر زور دیا ہے کہ وہ کثرتِ استغفار کریں، توبہ و رجوع الی اللہ اختیار کریں اور اللہ تعالی کی رحمت کے طلبگار بنیں، کیونکہ وہی ذات ہے جو آسمانوں سے بارش برسا کر زمین کو زندگی عطا کرتی ہے۔مملکت بھر میں اس روح پرور اجتماع کے لیے انتظامات مکمل کر لیے گئے ہیں اور توقع کی جا رہی ہے کہ لاکھوں فرزندانِ توحید سجدہ ربِ کریم سے گڑگڑا کر باران رحمت کی التجا کریں گے۔

کریڈٹ: انڈیپنڈنٹ نیوز پاکستان-آئی این پی