امریکا اور ایران کے درمیان روم میں ہفتے کو شیڈول جوہری مذاکرات کا چوتھا دور منسوخ کر دیا گیا، ایک سینئر ایرانی عہدیدار کے مطابق نئی تاریخ کا تعین امریکی رویے پر منحصر ہوگا۔غیر ملکی خبر رساں ادارے کے مطابق ایرانی عہدیدار نے بتایا کہ جوہری مذاکرات کے دوران ایران پر امریکی پابندیاں فریقین کو سفارتی طریقے سے جوہری تنازع حل کرنے میں مدد نہیں دے رہیں۔انہوں نے مزید کہا کہ امریکی رویے کو مدنظر رکھتے ہوئے مذاکرات کے اگلے دور کی تاریخ کا اعلان کیا جائے گا۔امریکا اور ایران کے درمیان پہلے مذاکرات میں ثالثی کرنے والے عمان نے کہا کہ 3 مئی کو ہونے والے جوہری مذاکرات کو لاجسٹک وجوہات کی بنا پر ری شیڈول کیا جائے گا۔تاہم، ایک امریکی ذرائع نے خبررساںادارے کو بتایا کہ امریکا نے روم میں مذاکرات کے چوتھے دور میں شرکت کی تصدیق نہیں کی تھی۔ذرائع نے کہا کہ مذاکرات کے اگلے دور کا وقت اور مقام ابھی تک تصدیق شدہ نہیں ہیں لیکن توقع ہے کہ جلد ہی اس حوالے سے معاملات طے پائیں گے۔ ایران کی وزارت خارجہ کے ترجمان اسمعیل بقائی نے کہا کہ تہران امریکا کے ساتھ نتیجہ خیز مذاکرات میں سنجیدگی اور عزم کے ساتھ شامل رہے گا۔

کریڈٹ: انڈیپنڈنٹ نیوز پاکستان-آئی این پی