بھارت کو پاکستان کی جانب سے حملے کا خوف برقرار ہے، جس کے پیش نظر بھارتی ائیرلائن انڈیگو اور ایئر انڈیا نے شمالی اور مغربی بھارت کے مختلف شہروں میں اپنی پروازیں معطل کردیں۔بھارتی میڈیا کی رپورٹس کے مطابق انڈیگو ایئرلائن نے ایک بیان میں کہا ہے کہ اس نے سری نگر، جموں، امرتسر، لیہ، چندی گڑھ اور راجکوٹ کے لیے اور ان شہروں سے آنے والی تمام پروازیں ہفتہ کی رات 12بجے تک منسوخ کر دی ہیں۔ائیرلائن نے اپنے بیان میں کہا کہ ہم سمجھتے ہیں کہ اس فیصلے سے آپ کا سفر متاثر ہوسکتا ہے جس کے لیے انتظامیہ معذرت خواہ ہے۔رپورٹ ایئر انڈیا نے بھی جموں، لیہ، جودھ پور، امرتسر، بھج، جام نگر، چندی گڑھ اور راجکوٹ کے لیے آنے اور جانے والی پروازیں منگل 13 مئی کے لیے منسوخ کرنے کا اعلان کیا۔

ایئر انڈیا نے یہ اطلاع ایکس پر دیتے ہوئے کہا کہ حالیہ پیش رفت کے تناظر اور آپ کی حفاظت کو مدنظر رکھتے ہوئے، 13 مئی بروز منگل، جموں، لیہ، جودھ پور، امرتسر، بھج، جام نگر، چندی گڑھ اور راجکوٹ کے لیے تمام پروازیں منسوخ کر دی گئی ہیں۔پیر کی شام ایک انڈیگو پرواز جو امرتسر جا رہی تھی، وہاں بلیک آٹ اقدامات نافذ ہونے کے بعد احتیاطا دہلی واپس لوٹ آئی۔ بھارتی خبررساںادارے کے مطابق ایئرلائنز کے ان اقدامات سے قبل بھارتی علاقے سامبا، اکھنور، جیسلمیر اور کٹھوعہ کے علاقوں میں ڈرونز دیکھے جانے کی اطلاعات موصول ہوئیں۔ تاہم، منگل کے روز بھارتی فوج نے وضاحت کی کہ حالیہ دنوں میں کسی بھی ڈرون کی موجودگی کا مشاہدہ نہیں کیا گیا اور جنگ بندی اب بھی برقرار ہے۔ واضح رہے دو روز قبل پاکستان اور بھارت نے جنگ بندی پر متفق ہونے کا اعلان کیا تھا۔

کریڈٹ: انڈیپنڈنٹ نیوز پاکستان-آئی این پی