پاکستان کے ہاتھوں سبکی کے بعد بھارت میں رافیل طیاروں سے متعلق اسکینڈل نے ایک بار پھر سراٹھا لیا ، کانگریس رہنمائوں نے شدید ردعمل دیا ہے ۔میڈیارپورٹس کے مطابق کانگریس رہنما رندیپ سنگھ سرجیوالا نے کہا ہے کہ ڈکٹیشن پر مبنی انٹرویوز اور گھڑی ہوئی جھوٹی باتیں رافیل اسکینڈل کو نہیں دبا سکتیں۔انہوں نے کہا کہ قوم کو تبدیل شدہ وضاحت نہیں بلکہ تحقیقات کی ضرورت ہے، بی جے پی حکومت اور ڈسالٹ کے درمیان طے شدہ میچ رافیل بدعنوانی کو چھپا نہیں سکتا۔ کانگریس رہنما رندیپ سنگھ سرجیوالا نے مزید کہا کہ مودی اور ایرک ٹراپیئر کے پی آر اسٹنٹس کرپشن پر پردہ نہیں ڈال سکتے۔کانگریس رہنما سنجے نروپم نے کہا کہ رافیل ڈیل میں تقریبا 41 ہزار کروڑ کی کرپشن کی گئی ہے، ان کا کہنا تھا کہ آج تک رافیل طیاروں کی اصل قیمت نہیں بتائی گئی۔کانگریس رہنما سنجے نروپم کا کہنا تھا کہ رافیل کی آفیشل ڈیل میں مودی کے دوست انیل امبانی کو خاص ترجیح دی گئی۔

کریڈٹ: انڈیپنڈنٹ نیوز پاکستان-آئی این پی