روس میں صدارتی انتخابات کے لیے آج سے تین روزہ پولنگ کا آغاز ہورہاہے۔میڈیا رپورٹس کے مطابق یہ روس کے آٹھویں صدارتی انتخابات ہیں، 15مارچ کو شروع ہونے والی ووٹنگ 16اور 17مارچ کو بھی جاری رہے گی۔ الیکشن میں چار امیدواروں کے درمیان مقابلہ ہوگا تاہم یقینی ہے کہ 71برس کے ولادیمیر پیوٹن ہی ایک بار پھر 6برس کیلئے صدر منتخب کرلیے جائیں گے، 4شخصیات نے خود کو صدارتی امیدوار کے طور پر رجسٹرڈ کرایا ہے جن میں سے دیگر 3روسی ایوان زیریں یعنی ڈوما کے اراکین نکولائی خریطونوف، لیانید سولوستکی اور ویلدیسلوف داونکوف ہیں جبکہ صدر بننے کے خواہشمند الیکسی نوالنی پراسرار موت کا شکار ہوچکے ہیں اور2کے کاغذات مسترد کردیے گئے۔سروے کے مطابق ولادیمیر پیوٹن ہی دوبارہ صدر بنیں گے، صدر پیوٹن نے ووٹنگ سے ایک روز پہلے پیغام میں کہا کہ یہ ملک میں انتہائی اہم الیکشن ہیں، اس کے نتائج آئندہ برسوں میں روس کی ترقی پر براہ راست نتائج مرتب کریں گے۔واضح رہے کہ پیوٹن کو سابق سوویت لیڈر بورس یلسن نے 1999میں نائب صدر مقرر کیا تھا، جس کے بعد انہوں نے سنہ 2000سے 2008تک دوبار صدارت اور پھر 2012تک وزارت عظمی سنبھالی،2012میں وہ تیسری بار اور 2018میں چوتھی بار صدر بنے تھے، آئینی طور پر مزید دو بار صدر بننے کی اجازت ہے۔

کریڈٹ: انڈیپنڈنٹ نیوز پاکستان-آئی این پی