امریکا میںحکومت کو تاریخ کے دوسرے طویل ترین شٹ ڈائون کی وجہ سے تقریبا 4 کروڑ 20 لاکھ افراد کے خوراک کی امداد سے محروم ہونے کا خطرہ بڑھ گیا جبکہ کانگریس میں ڈیموکریٹس اور ریپبلکنز ایک دوسرے کو ہفتوں سے جاری قانون سازی کے تعطل کا ذمہ دار ٹھہرا رہے ہیں۔غیرملکی خبر رساں ادارے کے مطابق دونوں جماعتوں کی جانب سے اپنے موقف میں تبدیلی کے کوئی آثار نظر نہیں آ رہے، حالاں کہ ہفتے سے سپلیمنٹل نیوٹریشن اسسٹنس پروگرام (ایس این اے پی) جسے فوڈ اسٹامپس بھی کہا جاتا ہے، کی فنڈنگ ختم ہونا شروع ہو جائے گی۔امریکی محکمہ زراعت (یو ایس ڈی اے )نے گزشتہ ہفتے یہ فیصلہ کیا تھا کہ وہ ہنگامی فنڈز استعمال نہیں کرے گا، جن سے نومبر کے جزوی فوائد ادا کیے جا سکتے تھے، اس فیصلے نے سینیٹ میں تقسیم پیدا کر دی ہے، ڈیموکریٹس کا کہنا ہے کہ یہ ادارہ قانونی طور پر پابند ہے کہ تقریبا ساڑھے 5 ارب ڈالر کے کنٹی جنسی فنڈز استعمال کرے تاکہ کم از کم کچھ فوائد برقرار رہ سکیں۔خوراک کی امداد کی فنڈنگ کی نگرانی کرنے والی اعلی ترین ڈیموکریٹ نیو ہیمپشائر کی سینیٹر جین شاہین نے کہا کہ ٹرمپ انتظامیہ بھوک کو سیاسی سودے بازی کے آلے کے طور پر استعمال کر رہی ہے، آخرکار یہ ایک انتخاب ہے۔ریپبلکنز کا کہنا ہے کہ سینیٹ کے ڈیموکریٹس اس شٹ ڈان کے ذمہ دار ہیں، کیوں کہ انہوں نے حکومت کو دوبارہ کھولنے کے لئے کنٹینیونگ ریزولیوشن (سی آر) کہلانے والے بل کے خلاف 13 بار ووٹ دیا ہے، تاکہ ریپبلکن اکثریت سے صحت کی دیکھ بھال کے معاملات پر رعایتیں حاصل کی جا سکیں۔

خوراکی امداد کے بجٹ کے انچارج اعلی ترین ریپبلکن نارتھ ڈکوٹا کے سینیٹر جان ہووین نے کہا کہ ڈیموکریٹس کو ایک صاف سی آرکے حق میں ووٹ دینا چاہیے تاکہ حکومت کھل سکے، اس طرح یہ سارے مسائل حل ہو جائیں گے۔وائٹ ہائو س کے آفس آف مینجمنٹ اینڈ بجٹ نے تبصرہ کرنے سے انکار کر دیا۔امریکی خوراک کی امداد کی لاگت اور دائرہ کار پر کانگریس میں باقاعدگی سے بحث ہوتی ہے، خاص طور پر اس وقت جب فارم بل پر دوبارہ مذاکرات ہوتے ہیں جو ایس این اے پی کو فنڈ کرتا ہے۔جولائی میں ٹرمپ اور ریپبلکنز کے ٹیکس اور اخراجات کے بل نے ایس این اے پی کے لئے کام کی شرائط کو سخت کیا تھا، اور ریاستی سطح پر اخراجات بڑھا دیے تھے، جس سے تقریبا 200 ارب ڈالر کی مجموعی فنڈنگ محدود ہو گئی تھی اور کچھ افراد پروگرام سے خارج ہو سکتے ہیں۔امریکا کی ہر ریاست میں شہری وفاقی فوائد پر انحصار کرتے ہیں، ان 5 ریاستوں میں جہاں فی کس سب سے زیادہ ایس این اے پی سے فائدہ اٹھانے والے شہری ہیں، جن کی آبادی کا 15 فیصد سے زیادہ حصہ اس پروگرام سے فائدہ اٹھاتا ہے، ان میں سے 3 ریاستوں لوزیانا، اوکلاہوما، اور ویسٹ ورجینیا کے سینیٹر ریپبلکن ہیں۔اسی ہفتے، ریپبلکن سینیٹر جوش ہالی نے نومبر کے لیے ایس این اے پی کی فنڈنگ کا ایک علیحدہ بل پیش کیا تھا، جسے منگل تک کچھ دو جماعتی شریک حمایت ملی، اس کے بعد سینیٹ کے ڈیموکریٹک رہنماں نے اپنی علیحدہ تجویز پیش کی تھی۔تاہم، سینیٹ کے ریپبلکن اکثریتی رہنما جان تھون نے سوال اٹھایا کہ جب گزشتہ ہفتے وفاقی ملازمین کو تنخواہ دینے کیلئے ایک اسی نوعیت کا ہدفی بل ناکام ہو گیا تھا تو سینیٹ کو اس بل پر ووٹ کیوں دینا چاہیے۔

کریڈٹ: انڈیپنڈنٹ نیوز پاکستان-آئی این پی