پاکستان جمہوری لیگ کے سربراہ رانا زمان سعید نے کہا ہے کہ ملکی سیاسی صورتحال اس بات کا عندیہ دے رہی ہے کہ8فروری کو پاکستان کی تاریخ کے بد ترین الیکشن ہونگے،پری پول دھاندلی نے تمام ریکارڈ توڑ دیے ہیں، الیکشن کمیشن مکمل طور پر جانبداری کا مظاہرہ کر رہا ہے ، دھاندلی زدہ الیکشن کے نتیجے میں بننے والی حکومت انتہائی کمزور ہو گی ،ملک اور جمہوریت کی مضبوطی کے لئے صاف اور شفاف الیکشن کا انعقاد ازحد ضروری ہے،اتور کو صحافیوں سے گفتگو کرتے ہوئے رانا زمان سعید نے کہا ہے کہ اس وقت ملک میں لاقانونیت کا راج ہے ،صرف ایک شخص کو خوش کرنے کے لئے لوگوںکو ان کے بنیادی حقوق سے محروم کیا جا رہا ہے ، سیاسی قائدین اور کارکنان کو جیلوں میں ڈالا جا رہا ہے، انہوں نے کہا کہ ملکی تاریخ گواہ ہے کہ جو پری پول دھاندلی اس وقت ہو رہی ہے ماضی میں ایساکبھی نہیں ہوا،امیدواروں سے کاغذات نامزدگی چھیننا خوف کی علامت ہے ، انہوں نے کہا کہ الیکشن کمیشن کا کردار انتہائی مایوس کن ہے، سیاسی جماعتوں کو سہولیات فراہم کرنے کی بجائے الیکشن کمیشن مخصوص جماعت کا راستہ صاف کرنے کی پالیسی پر عمل پیرا ہے ، جس جماعت کو الیکشن جتوانا چاہتے ہیں اگر وہ اتنی مقبول ہے تو اسے میدان میں مقابلہ کرنا چاہیے ، انہوں نے کہا کہ قوم کے اربوں روپے خرچ کرکے دھاندلی زدہ الیکشن کرانے سے بہتر ہے کہ لاڈلے کی الیکشن کے بغیر ہی تاج پوشی کر دی جائے تاکہ وہ مستقبل میںپاکستان سے انتقام نہ لے،انہوں نے کہا کہ سیاسی استحکام اور جمہوریت کی مضبوطی صاف اور شفاف الیکشن کے بغیر ممکن نہیں ،اگر ایک شخص کو خوش کرنے کے لئے الیکشن کا ڈرامہ رچایا گیا تو اس کی قیمت ملک اور قوم کو ادا کرنی پڑے گی۔

کریڈٹ: انڈیپنڈنٹ نیوز پاکستان-آئی این پی