اسلام آباد کی ڈسٹرکٹ اینڈ سیشن کورٹس نے 5 اگست کے احتجاج کیس میں گرفتار پی ٹی آئی کارکنان کی ضمانت کی درخواستیں منظور کر لیں۔جوڈیشل مجسٹریٹ عمران امیر عباسی نے 5 اگست کے احتجاج کیس میں گرفتار پی ٹی آئی کارکنان کی ضمانت کی درخواستوں پر سماعت کی، پی ٹی آئی کارکنان کی جانب سے مرزا عاصم بیگ، انصر کیانی، شمسہ کیانی اور دیگر وکلا عدالت میں پیش ہوئے۔پی ٹی آئی کے وکیل مرزا عاصم ایڈووکیٹ نے عدالت کو بتایا کہ یہ ایک بے بنیاد مقدمہ ہے جس کی ایف آئی آر کا مدعی ہی متعلقہ شخص نہیں ہے، اسی مقدمے میں خواتین کارکنان کی ضمانتیں پہلے ہی منظور ہو چکی ہیں۔وکیل انصر کیانی نے موقف اختیار کیا کہ پولیس ریکارڈ کے مطابق بھی کسی ملزم سے کوئی ریکوری نہیں ہوئی، مرزا عاصم بیگ نے کہا کہ اس مقدمے کے بعد بھی ایک اور کیس درج کیا گیا جس میں بھی وہی دفعات کاپی پیسٹ کی گئیں۔وکلا کے دلائل سننے کے بعد عدالت نے 9 کارکنان کی ضمانتیں 10،10 ہزار روپے کے مچلکوں کے عوض منظور کر لیں، کارکنان کے خلاف تھانہ لوہی بھیر میں پاپو سمیت دیگر دفعات کے تحت مقدمہ درج کیا گیا تھا۔

کریڈٹ: انڈیپنڈنٹ نیوز پاکستان-آئی این پی