اسلام آباد کلیفٹ لپ اینڈ پلیٹ ایسوسی ایشن(آئی سی ایل اے پی اے)کے زیر اہتمام اسلام آباد میں کٹے ہوئے ہونٹوں اور تالو کے مریضوں کے علاج کے لئے فری میڈیکل کیمپ کا انعقاد کیا گیا، کیمپ میں کٹے ہونٹ اور تالو کے 23متاثر مریضوں کا معائنہ کیا گیا۔ایسوسی ایشن کی سینئر رکن فرحت اختر رحمان کے مطابق ان مریضوں کو علاج اور سرجری کے لئے شارٹ لسٹ کیا گیا تھا، مریضوں میں ملاکنڈ سمیت دور دراز کے علاقوں سے تعلق رکھنے والے افراد بھی شامل تھے۔ انہوں نے بتایا کہ اسلام آباد اور راولپنڈی کے مقامی ہسپتالوں میں جلد ہی علاج اور سرجری کا عمل شروع کر دیا جائے گا۔ ڈاکٹر اظہر شیخ کی قیادت میں ڈاکٹروں اور سرجن کی ایک ٹیم نے مریضوں کے معائنے کئے۔ کیمپ کا اہتمام اسلام آباد کلیفٹ لپ اینڈ پلیٹ ایسوسی ایشن (آئی سی ایل اے پی اے ) نے کیا تھا۔ ایسوسی ایشن کی سرجنز کی ٹیم ہونٹوں اور تالو کے مریضوں کے چہروں پر مسکراہٹ لانے کے لئے کام اور ان کی زندگی میں مثبت تبدیلی لا رہی ہے۔ ایسوسی ایشن 2004 سے مخیر حضرات کے تعاون سے غریب خاندانوں کو مفت طبی سہولیات فراہم کر رہی ہے۔آئی سی ایل اے پی اے رضاکاروں کا ایک گروپ ہے جو لوگوں کی زندگیوں میں امید اور خوشی لانے کے لئے عطیہ دہندگان پر انحصار کرتا ہے ۔آئی سی ایل اے پی اے سے متعلق کسی بھی مدد اور رہنمائی کے لئے 03335157676 ، 03005192490 پر رابطہ کریں۔

کریڈٹ: انڈیپنڈنٹ نیوز پاکستان-آئی این پی