سندھ کے ضلع عمرکوٹ میں حلقہ این اے 213 میں ضمنی الیکشن آج (جمعرات کو) ہورہاہے ۔اس ضمن میںتیاریاں مکمل کرلی گئیں ، ضلع میں عام تعطیل ہوگی جبکہ سیکورٹی کے سخت ترین انتظامات کئے گئے ہیں۔تفصیل کے مطابق ضلع عمرکوٹ میں حلقہ این اے 213 میں آج (جمعرات کو) ضمنی الیکشن کے موقع پرپولنگ ہوگی ۔ انتخابی سامان کی ترسیل سمیت تمام تر تیاریاں مکمل کرلی گئی ہیں۔ اکستان پیپلز پارٹی کی امیدوار صبا تالپور اور جی ڈے اے کے حمایت یافتہ پی ٹی آئی امیدوار لال چند مالہی میں سخت مقابلہ متوقع ہے، حلقے میں پولنگ سٹیشنز کی کل تعداد 498 ہے جن میں سے 269 کو حساس اور 91 کو انتہائی حساس قرار دیا گیا ہے۔

ضمنی الیکشن کے موقع پر صوبائی حکومت کی جانب سے آج عمرکوٹ ضلع میں عام تعطیل کا اعلان کیا گیا ہے، یہ نشست پیپلز پارٹی کے رہنما نواب یوسف تالپور کے انتقال کے بعد خالی ہوئی تھی۔ضمنی الیکشن کے موقع پر ضلع بھر میں سیکورٹی کے بھی انتہائی سخت انتظامات کئے گئے ہیں ،سیکیورٹی فورسز کی بھاری نفری تعینات کی گئی ہے ۔ دریں اثنا پاکستان پیپلز پارٹی کے رہنما شرجیل انعام میمن نے کہا ہے کہ عمرکوٹ کے ضمنی انتخاب میں ایک بار پھر پاکستان پیپلز پارٹی کا مقابلہ تمام سیاسی جماعتوں کے اتحاد سے ہے۔شرجیل میمن نے سماجی رابطوں کے پلیٹ فارم ایکس پر اپنے ایک پیغام میں کہا کہ پی ٹی آئی امیدوار کی حمایت میں جی ڈی اے، مسلم لیگ ن، جے یو آئی (ف)، تمام مذہبی جماعتیں اور قوم پرست جماعتیں اکٹھی ہوگئی ہیں۔انہوں نے کہا کہ پاکستان پیپلز پارٹی کو شکست دینا تمام جماعتوں کے اتحاد کا خواب ہے، انشا اللہ، پاکستان پیپلز پارٹی اللہ کے فضل و کرم سے کامیاب ہوگی۔

کریڈٹ: انڈیپنڈنٹ نیوز پاکستان-آئی این پی