پاکستان پیپلزپارٹی کے رہنما نبیل گبول نے کہاہے کہ بانی پی ٹی آئی عمران خان خود جیل میں ہیں اگر چاہیں تو باہر آسکتے ہیں۔ ایک انٹرویو میں انہوں نے کہا کہ جس طرح سے عمران خان کے ساتھ ڈائیلاگ چلے اگر وہ ضد نہ کرتے تو باہر ہوتے، عمران خان چاہتے ہیں جیل سے سیدھا وزیراعظم آفس جائیں وہ چلہ کاٹ رہے ہیں اور موکل ہیں، انہیں لگتا ہے باہر آئے تو مقبولیت کم ہوگی، اس وقت ہائیبرڈ پی ٹی آئی ہے جب عمران خان کسی چیز پر پہنچتے ہیں تو پی ٹی آئی کے نئے لوگ غلط مشورہ دیتے ہیں۔ایک سوال پر نبیل گبول نے کہا کہ خواجہ آصف خود ہائبرڈ وزیر دفاع ہیں اور ان کے اس بیان سے ان کی پارٹی اور نوازشریف کے درمیان دوریاں بڑھ گئی ہیں، پی پی کا ہائیبرڈ بیان سے کوئی تعلق نہیں ہے، اس سے پہلے چوہدری نثار اور شاہد خاقان عباسی ایسی باتیں کرتے تھے تو پھر پارٹی چھوڑنا پڑی، خواجہ آصف بھی اپنی آخری شاٹ کھیل رہے ہیں۔پیپلزپارٹی رہنما نے کہا کہ نواز شریف اپنی سیٹ ہارگئے تھے، کس کونہیں پتہ کہ نواز شریف ہار گئے تھے لیکن اس کے باوجود ایک سیٹ پھر ان کو مل گئی تھی، وہ حکومت نہیں لیتے لیکن پھر شہباز شریف نے اپنا کردار ادا کیا، کہنے کو تو اور بھی بہت کچھ ہے لیکن کس سے کہیں؟ ہم سرکس کے شیر ہیں، ن لیگ اپنے وعدے پر قائم نہیں رہتی۔

کریڈٹ: انڈیپنڈنٹ نیوز پاکستان-آئی این پی