قائد ملت جعفریہ پاکستان علامہ سید ساجد علی نقوی نے کہا ہے کہ ملکی سلامتی و استحکام کے لئے ہماری جدوجہد تسلسل کے ساتھ جاری ہے اور اس راستے میں زندگی سے کے مختلف شعبہ ہائے حیات سے وابستہ محب وطن' مخلص شخصیات نے قیمتی جانوں کے نذرانے پیش کرنے سے بھی دریغ نہیں کیا اسی تناظر میں ممتازسیاسی و سماجی شخصیت اور ملی پلیٹ فارم کے صوبائی رہنما محمد ایوب صدیقی نے متواتر اور مسلسل جدوجہد جاری رکھی اور اعلی و ارفع اہداف کے حصول کی خاطر پاکیزہ مشن کی تکمیل کرتے ہوئے اس راہ میں درجہ شہادت پر فائز ہوگئے۔شہید محمد ایوب صدیقی کی 29 ویںبرسی کی مناسبت سے اپنے پیغام میں علامہ ساجد نقوی کاکہنا ہے کہ عوام کے ' آئینی اور شہری حقوق کا دفاع اور تحفظ ہماری جدوجہد کا مرکز و محور رہا اسی تناظر میں محمد ایوب صدیقی نے عوام کے شہری حقوق کی جدوجہد میں نمایاں کردار ادا کیا اور شریف' مہذب' قانون پسند اور محب وطن شہریوں کو شہری حقوق کی فراہمی میں انتھک محنت و کوشش کی۔انہوں نے مزید کہا کہ شہید کی ملی خدمات کو خراج عقیدت پیش کرنے کے لئے لازم و ناگزیر ہے ان کے مثبت کردار کو مشعل راہ بنایا جائے ۔برسی کے اس موقع پر قائد ملت جعفریہ پاکستان نے محمد ایوب صدیقی اور شہدائے ملت کے درجات کی بلندی اور وطن عزیز کے استحکام و سلامتی کی خصوصی دعا کی۔

کریڈٹ: انڈیپنڈنٹ نیوز پاکستان-آئی این پی