آزاد کشمیر کے مختلف اضلاع میں گزشتہ رات سے جاری مسلسل بارش کے باعث مختلف علاقوں میں لینڈ سلائیڈنگ کے واقعات پیش آئے ہیں، جس کے نتیجے میں متعدد مرکزی اور مقامی سڑکیں آمد و رفت کے لیے عارضی طور پر بند ہو گئیں۔ ضلع کوٹلی اور اس کے گردونواح میں بارشوں سے بند ہونے والی سڑکوں میں ککنی بگاہ روڈ (تحصیل کوٹلی)، دھناں لفٹ سٹاپ روڈ (تحصیل کھوئی رٹہ)، رہیاں تا کوٹلی روڈ (تحصیل کوٹلی) اور گوئی تا دندلی روڈ (تحصیل کوٹلی) شامل ہیں۔ محکمہ شاہرات نے تمام متاثرہ مقامات پر مشینری روانہ کر دی ہے اور سڑکوں کو جلد از جلد بحال کرنے کے لیے کام جاری ہے۔ اس کے علاوہ راولاکوٹ، باغ،مظفر آباد ،نیلم اور دیگر اضلاع میں بھی شدید بارش کے باعث دریا، ندی نالوں اور برساتی راستوں میں شدید طغیانی کی صورتحال پیدا ہو گئی

جس سے ممکنہ طور پر جانی و مالی نقصان کا خدشہ ہے۔شہریوں کو سختی سے ہدایت کی گئی ہے کہ وہ ندی نالوں، دریاوں اور تیز بہا والے پانی کے قریب جانے سے گریز کریں، غیر ضروری سفر سے پرہیز کریں اور بچوں کو بھی ایسے مقامات سے دور رکھیں۔ کسی بھی ہنگامی صورتحال میں فوری طور پر ضلعی کنٹرول روم یا ریسکیو اداروں سے رابطہ کرنے کی اپیل کی گئی ہے۔ضلعی انتظامیہ شہریوں سے تعاون کی اپیل کرتے ہوئے کہا ہے کہ احتیاط ہی بہترین تحفظ ہے۔ دریں اثناء شدید بارش کے باعث پاکستان اور آزادکشمیر کو ملانے والی کہوٹہ آزاد پتن روڈ کو ٹھنڈا پانی کے مقام پرلینڈ سلائیڈنگ سے ٹریفک معطل کردیا گیا۔ریسکیو حکام نے کہوٹہ سفر کیلئے متبادل راستہ کوٹلی کہوٹہ روڈ استعمال کرنے کی ہدایت کی ہے جب کہ کہوٹہ آزاد پتن روڈ ٹھنڈا پانی پر روڈ کلیئرنس اور ٹریفک کی بحالی کا کام جاری ہے ۔ادھر نیلم میں بھی کلائوڈ برسٹ نے تباہی مچادی ہے ۔

کریڈٹ: انڈیپنڈنٹ نیوز پاکستان-آئی این پی