اقوامِ متحدہ کے سیکرٹری جنرل انتونیو گوتریس نے پاکستان اور بھارت میں تباہ کن سیلابوں کے نتیجے میں ہونے والے جانی نقصان پر گہرے دکھ کا اظہار کرتے ہوئے کہا ہے کہ اگر مدد کی درخواست کی گئی تو اقوامِ متحدہ تیار ہے۔ترجمان اسٹیفن دوجارک کی جانب سے جاری بیان میں کہا گیا ہے کہ سیکرٹری جنرل نے متاثرہ خاندانوں سے دلی تعزیت کا اظہار کیا اور اس سانحے سے متاثرہ افراد کے ساتھ اظہارِ یکجہتی بھی کرتے ہوئے کہا کہ اگر درخواست کی گئی تو ہم مدد فراہم کرنے کے لیے تیار ہیں۔ قبل ازیں کیتھولک مسیحیوں کے روحانی پیشوا پوپ لیو چہار دہم نے بھی متاثرین کیلئے دعائیں کیں اور کہا کہ اس آفت کی وجہ سے جو لوگ تکالیف کا شکار ہیں، ان کے لیے دعا گو ہوں۔پوپ لیو نے پاکستان، بھارت اور نیپال کے ان عوام کے ساتھ ہمدردی کا اظہار کیا جو شدید بارشوں اور سیلاب سے متاثر ہوئے ہیں۔انہوں نے کہا کہ وہ متاثرین اور ان کے اہل خانہ، اور ان سب کے لیے جو اس آفت کی وجہ سے تکلیف میں ہیں، دعا گو ہیں۔

کریڈٹ: انڈیپنڈنٹ نیوز پاکستان-آئی این پی