نائب وزیراعظم و وزیرخارجہ اسحاق ڈار نے امریکا اور ایران کے درمیان مفاہمت کا گرمجوشی سے خیر مقدم کرتے ہوئے کہا کہ پاکستان جاری مذاکرات میں ہر ممکن تعاون کیلئے تیار ہے، امید ہے کہ 19 جون کو جنیوا میں ہونیوالی باضابطہ دستخطی تقریب خطے میں دیرپا امن، استحکام اور خوشحالی کی بنیاد بنے گی۔جاری بیان کے مطابق وزیر خارجہ اسحاق ڈار نے کہا ہے کہ یہ اہم پیش رفت مسلسل سفارتی کوششوں اور دوست ممالک کے اس اجتماعی عزم کی عکاسی کرتی ہے کہ تصادم کے بجائے مذاکرات اور بات چیت کا راستہ اختیار کیا جائے۔بیان میں کہا گیا ہے کہ یہ پیش رفت عالمی برادری کیلئے بھی ایک حوصلہ افزا پیغام ہے، جو عالمی منڈیوں اور معیشت میں اعتماد اور استحکام کو فروغ دے گی، خصوصا ان ترقی پذیر ممالک کیلئے جو علاقائی کشیدگی سے سب سے زیادہ متاثر ہوتے ہیں۔انہوں نے کہا کہ پاکستان نے اس پورے عمل کے دوران تمام متعلقہ فریقوں کے ساتھ فعال رابطہ برقرار رکھا اور مسلسل تحمل، بردباری اور تعمیری سفارتی مکالمے پر زور دیا، پاکستان کا موقف رہا ہے کہ تمام مسائل کا واحد قابلِ عمل حل مذاکرات اور سفارت کاری کے ذریعے ہی ممکن ہے۔

اسحاق ڈار نے کہا کہ پاکستان نے امریکا اور ایران کی قیادت کی جانب سے اپنے ملک پر کیے گئے اعتماد کو سراہتے ہوئے دونوں ممالک کے اس عزم کی تعریف کی کہ وہ پرامن اور باہمی اتفاقِ رائے پر مبنی حل کیلئے مذاکرات جاری رکھیں گے۔بیان میں سعودی عرب، قطر، ترکیہ، مصر اور دیگر برادر ممالک کے ساتھ ساتھ اقوام متحدہ اور بین الاقوامی شراکت داروں کی مخلصانہ سفارتی کوششوں پر بھی اظہارِ تشکر کیا گیا، جنہوں نے اس اہم پیش رفت کو ممکن بنانے میں موثر کردار ادا کیا۔نائب وزیراعظم نے کہا کہ پاکستان باقی معاملات پر مذاکرات کے دوران بھی وہ اس پیش رفت کو مزید مستحکم بنانے کی ہر ممکن کوشش میں تعاون کیلئے تیار ہے۔انہوں نے یہ بھی کہا کہ پاکستان کو توقع ہے کہ 19 جون کو جنیوا میں ہونے والی باقاعدہ دستخطی تقریب اس مثبت پیش رفت کو مزید مضبوط بنائے گی اور یہ معاہدہ خطے سمیت پوری دنیا میں دیرپا امن، استحکام اور مشترکہ خوشحالی کی راہ ہموار کرے گا۔

کریڈٹ: انڈیپنڈنٹ نیوز پاکستان-آئی این پی