پنجاب کے شہر اوکاڑہ کے ایک نواحی گائوں میں سسرالیوں نے شادی شدہ لڑکی کو فروخت کر دیا۔تفصیل کے مطابق اوکاڑہ تھانہ صدر کی حدود 22 جیڈی میں ایک اندوہ ناک واقعہ پیش آیا ہے، 20 سالہ لڑکی کو اس کے جیٹھ، دیور اور سسرالیوں نے 50 ہزار روپے میں فروخت کر دیا۔اوکاڑہ پولیس کا کہنا ہے کہ سدرہ نامی لڑکی کو خانیوال کے علاقے کچا کھوہ میں جسم فروش گروہ کو فروخت کیا گیا، لڑکی کو ایک ماہ تک زیادتی کا نشانہ بنایا جاتا رہا، موقع ملنے پر وہ فرار ہو کر گھر پہنچ گئی۔متاثرہ لڑکی کے شوہر اکرام کی جانب سے مقدمے کے لئے ڈی پی او کو درخواست دی گئی ہے، تھانہ طیب سعید شہید پولیس نے ایک ملزم کو گرفتار بھی کر لیا ہے، پولیس کا کہنا ہے کہ متاثرہ لڑکی شادی شدہ اور 2 بچوں کی ماں ہے۔ملزمان کے والدین نے بھی پولیس کے سامنے اعتراف کیا ہے کہ ان کے بیٹوں آصف اور اکرم نے ان کی بہو کو فروخت کیا۔ ایک ویڈیو بیان میں والدہ نے کہا کہ ان کے بیٹوں نے بہت غلط اور گندا کام کیا ہے، جس کی انھیں سزا ملنی چاہیے چاہے وہ سزائے موت ہی کیوں نہ ہو۔ والد نے بھی کہا کہ ان کے ملزمان بیٹوں کو عبرت ناک سزا ملنی چاہیے۔

کریڈٹ: انڈیپنڈنٹ نیوز پاکستان-آئی این پی