ساڑھے چار لاکھ اوورسیز اپنے آبائی علاقوں میں صحت اور تعلیم کے میدان میں انقلاب برپا کر رہے ہیں، منڈی بہاوالدین کا گاوں موجیانوالہ بھی اورسیز پاکستانیوں کے جذبہ خیر سگالی کی نادر مثال ، جہاں بچیوں کی تعلیم کے لئے کروڑوں روپے کی لاگت سے گورنمنٹ سکول تعمیر کیا جا چکا ہے۔ تفصیلات کے مطابق اوورسیز پاکستانی رہتے تو پاکستان سے دور ہیں لیکن وطن کی محبت ہمیشہ ان کے دلوں میں بستی ہے۔ اسی حب الوطنی میں اوورسیز پاکستانی اپنے ملک کو درپیش مسائل کے حل کے لئے اپنے تئیں کاوشیں جاری رکھتے ہیں۔ضلع منڈی بہاوالدین اور گجرات سے تعلق رکھنے والے ساڑھے چار لاکھ اوورسیز اپنے آبائی علاقوں میں صحت اور تعلیم کے میدان میں انقلاب برپا کر رہے ہیں۔ اس علاقے میں درجنوں ایسے منصوبے تکمیل پا چکے جس سے عام آدمی کی زندگی میں مثبت تبدیلی واقع ہوئی ہے۔ ضلع منڈی بہاوالدین میں موجود گاوں موجیانوالہ بھی اورسیز پاکستانیوں کے جذبہ خیر سگالی کی نادر مثال ہے جہاں بچیوں کی تعلیم کے لئے کروڑوں روپے کی لاگت سے گورنمنٹ سکول تعمیر کیا جا چکا ہے۔ گزشتہ حکومت نے اس علاقے سے تعلق رکھنے والے اوورسیز کی خواہش پر اسی کو سکول کالج کا درجہ دے دیا جس کی وجہ سینکڑوں بچیوں کو میٹرک کے بعد اپنی تعلیم جاری رکھنا آسان ہوگا ۔اسی علاقے سے تعلق رکھنے والے برطانوی سیاست لارڈ واجد خان، ڈاکٹر انصر حیات اور چوہدری ساجد علی نے کالج کی منظوری پر وزیر اعلی محسن نقوی اور سابق وزیر اعظم شہباز شریف کا خصوصی شکریہ ادا کیا۔ حکومت اگر سہولیات فراہم کرئے تو اوورسیز پاکستانی اپنے آبائی علاقوں میں مسائل کے حل لئے اپنا کردار ادا کر سکتے ہیں۔

کریڈٹ: انڈیپنڈنٹ نیوز پاکستان-آئی این پی