پاکستان اور ترکیہ نے مشترکہ طور پر فلسطینی عوام سے اظہار یکجہتی اور غزہ میں فوری انسانی امداد کی فراہمی کا مطالبہ کیا ہے ۔دفتر خارجہ کے ترجمان شفقت علی خان نے بتایا کہ نائب وزیر اعظم اسحاق ڈار کی ترک وزیر خارجہ حاقان فیدان سے او آئی سی وزرائے خارجہ کونسل اجلاس کی سائیڈ لائنز پر ملاقات ہوئی۔ملاقات میں برادر ممالک کے رہنمائوں نے فلسطینی عوام سے یکجہتی کا اظہار کیا اور مطالبہ کیا کہ غزہ میں فوری انسانی امداد کی فراہمی یقینی بنائی جائے۔اس موقع پر اسحاق ڈار نے کہا کہ پاکستان ترکیہ سے تعلقات کو وسیع البنیاد شعبوں میں فروغ دینے کا خواہاں ہے۔ دونوں رہنمائوں نے پاک ترک برادرانہ تعلقات کی توثیق کی اور کثیر الجہتی تعاون کو مزید مضبوط بنانے کے عزم کا اظہار کیا۔اس موقع پر اسحاق ڈار نے 51ویں او آئی سی وزرائے خارجہ کونسل کی چیئرمین شپ کے دوران ترکی کے قائدانہ کردار پر ستائش کا اظہار کیا۔ملاقات میں فلسطین کے ساتھ مکمل یکجہتی کا اعادہ کیا گیا اور اس بات پر زور دیا گیا کہ فلسطین میں بڑھتے ہوئے انسانی بحران خصوصا غزہ میں قحط کے پیشِ نظر فوری انسانی امداد کی اشد ضرورت ہے۔

کریڈٹ: انڈیپنڈنٹ نیوز پاکستان-آئی این پی