پی ٹی آئی رہنما اسد قیصر نے اسمبلیاں تحلیل کر کے نئے انتخابات کا مطالبہ کرتے ہوئے کہا کہ حکومت کی بریفنگ میں نہ شرکت کرنے کا کوئی افسوس نہیں، مطالبات کی تکمیل تک جدوجہد جاری رکھیں گے۔اپنے ایک بیان میں اسد قیصر نے کہا کہ ملک کی موجودہ سیاسی اور معاشی صورتحال میں تبدیلی کی ضرورت ہے اور نئے انتخابات ہی مسائل کا حل ہیں، اپنے مطالبات کی تکمیل تک اپنی جدوجہد جاری رکھیں گے اور کسی دبائو کا شکار نہیں ہوں گے۔اسد قیصر نے اس بات پر زور دیا کہ تحریک انصاف اپنے موقف پر قائم ہے اور ہر ممکن کوشش کرے گی تاکہ عوامی مسائل کا حل نکالا جا سکے۔ انہوں نے یہ بھی واضح کیا کہ اسمبلیوں کی تحلیل اور نئے انتخابات کرانے کے بغیر ملک میں سیاسی استحکام ممکن نہیں۔انہوں نے کہا کہ حکومت کی طرف سے مسلسل بے حسی اور عوامی مسائل کو نظرانداز کیا جا رہا ہے، جس کی وجہ سے موجودہ صورتحال پیدا ہوئی ہے، ہماری جماعت کسی بھی قیمت پر اپنے مطالبات کی تکمیل کے لیے جدوجہد جاری رکھے گی۔ اسد قیصر نے قوم کو یقین دلایا کہ تحریک انصاف ملک کی فلاح کے لیے ہر ممکن قدم اٹھائے گی اور اس راستے پر چلتے ہوئے کسی قسم کی قربانی دینے سے گریز نہیں کرے گی۔

کریڈٹ: انڈیپنڈنٹ نیوز پاکستان-آئی این پی