پاکستان مسلم لیگ (ن) اوورسیز کے صدر چوہدری عبد الرحمان نے کہا ہے کہ بھارتی سپریم کورٹ نے مقبوضہ کشمیر کی خصوصی حیثیت برقرار رکھنے کا فیصلہ دے کر انصاف کا قتل عام کرتے ہوئے یہ ثابت کر دیا ہے کہ بھارت ایک فاشسٹ ہندو ریاست ہے،کشمیر پر بھارت کے غاصبانہ قبضے کو اقوام متحدہ سمیت ہر بین الاقوامی فورم نے تسلیم کر رکھا ہے ، بھارتی سپریم کورٹ کے فیصلے کے خلاف اقوام عالم کو آواز بلند کرنی چاہیے، گزشتہ روز صحافیوں سے گفتگو کرتے ہوئے چوہدری عبد الرحمان نے کہاکہ بھارتی سپریم کورٹ کا فیصلہ متعصبانہ اورغیر منصفانہ ہے ،اس فیصلے کے ذریعے انصاف کی دھجیاں بکھیری گئی ہیں اور بھارت کا مکروہ چہرہ دنیا کے سامنے بے نقاب ہوا ہے ،انہوں نے کہا کہ مقبوضہ کشمیر ایک عالمی مسئلہ ہے جسے اقوام متحدہ نے تسلیم کر رکھا ہے اور اس کا حل بھی اقوام متحدہ کی قرار دادوں میں موجود ہے ،بھارتی سپریم کورٹ کے فیصلے کی کوئی حیثیت نہیں،انہوں نے کہا کہ ہم اس فیصلے کے خلاف بھر پور احتجاج کرینگے، دنیا کو مظلوم کشمیروں کے حق میں آواز بلند کرکے مسئلہ کشمیر کے حل کے لئے دباو بڑھانا ہو گا،انہوں نے کہا کہ بھارت مقبوضہ کشمیر میں انسانی حقوق کی خلاف ورزیاں کر رہا ہے اور بھارتی عدالتیں ہندوستان سرکار کے انسانیت مخالف اقدامات کو تحفظ فراہم کر رہی ہے جو بھارتی ججز کا انتہائی شرمناک فعل ہے۔

کریڈٹ: انڈیپنڈنٹ نیوز پاکستان-آئی این پی