وزیر اعلی خیبر پختونخوا علی امین گنڈا پور نے کہا ہے کہ آئندہ مالی کے بجٹ سے متعلق بانی پی ٹی آئی عمران خان کا وژن کیا ہے سب کو معلوم ہے، جتنے صوبائی بجٹ پیش ہوئے ہیں، ان سب سے بہترین بجٹ ہمارے صوبے کا ہے۔ بدھ کو سپریم کورٹ کے باہر میڈیا سے گفتگو میں ان کا کہنا تھا کہ وہ بانی پی ٹی آئی کی ہدایت پر عدالت آئے ہیں اور کئی دنوں سے ان سے ملاقات کی کوششیں جاری تھیں، لیکن ایک منظم سازش کے تحت انہیں روکا جا رہا ہے۔ ان کا کہنا تھا کہ بانی کی ہدایت تھی کہ ہم سپریم کورٹ آئیں، بانی کی ہدایت پر آج سپریم کورٹ آیا ہوں، کمرہ عدالت میں جسٹس منصور علی شاہ موجود تھے، جسٹس منصور علی شاہ نے بولنے کا موقع دیا۔علی امین گنڈا پور نے کہا کہ بانی کے خط کے حوالے سے جسٹس منصور علی شاہ کو آگاہ کیا، پہلے ہمارا مینڈیٹ چوری کیا گیا، اور 26ویں آئینی ترمیم کے بعد عدلیہ کو عملی طور پر ہتھکڑیاں لگا دی گئیں۔ بطور پاکستانی ہم نے ملک کے لیے قربانیاں دی ہیں، بحیثیت وزیراعلی سپریم کورٹ میں جب آیا تو یہی سوچا تھا کہ چیف جسٹس سے ڈسکس کروں گا۔وزیر اعلی کے پی نے کہا کہ امید ہے ہماری درخواست جلد سماعت کے لئے مقرر ہوگی، بجٹ سے متعلق سوال پر علی امین گنڈا پور کا کہنا تھا، بانی پی ٹی آئی کا وژن سب کے سامنے ہے۔ جو بجٹ ہم نے دیا ہے، وہ تمام پیش کیے گئے بجٹوں میں سب سے بہترین ہے۔

انہوں نے مائنس بانی پی ٹی آئی کے بیانیے کو سختی سے مسترد کرتے ہوئے کہا، ایسی باتیں محض مفروضے ہیں، جو لوگ یہ باتیں کر رہے ہیں وہ عقل سے عاری ہیں۔ بانی پی ٹی آئی کے ہوتے ہوئے مجھے کسی بڑے عہدے کی خواہش نہیں، ایسی باتیں کرنا محض بیوقوفی ہے۔علی امین گنڈا پور نے نتھیا گلی میں قیام سے متعلق بھی وضاحت کرتے ہوئے کہا، میں صرف ایک دن کے لیے وہاں گیا تھا، اور کل ایک نیا سوشہ چھوڑ دیا گیا کہ میری کسی سے ملاقات ہوئی ہے۔ یہ سب جھوٹ ہے، صرف پیسے کمانے کے لیے یہ افواہیں پھیلائی جا رہی ہیں۔وزیراعلی نے گفتگو کے اختتام پر واضح کیا کہ، بانی پی ٹی آئی ہی ہماری سیاست کی ترجیح ہیں، اور ہم ان کے ہر فیصلے کے ساتھ کھڑے ہیں۔انہوں نے مزید کہا کہ بجٹ منظوری کا عمل اسمبلی میں چل رہا ہے، تحریک انصاف کی بجٹ کمیٹی بانی پی ٹی آئی سے ملاقات کرے گی۔ قبل ازیں وزیراعلی خیبر پختونخوا علی امین گنڈاپور عمران خان سے ملاقات کی اجازت کے لیے سپریم کورٹ پہنچ گئے ۔ علی امین گنڈا پور عمران خان سے ملاقات کی اجازت کے لیے جسٹس منصور علی شاہ کی عدالت میں پیش ہوئے جس پر جسٹس منصور نے کہا کہ چیف جسٹس یحیی آفریدی لاہور میں ہیں لہذا ان سے رجوع کریں۔

کریڈٹ: انڈیپنڈنٹ نیوز پاکستان-آئی این پی