جمعیت علماء اسلام (ف) نے کہا ہے کہ بلاول بھٹو زرداری بوکھلا گئے ہیں' جماعت کے اندر باپ اور بیٹے کی جنگ ہے' جے یو آئی پورے ملک میں انتخابات میں بہترین کارکردگی دکھائے گی' الیکشن سے اتحادی نہیں بھاگ رہے بلکہ ان کی جماعت کے اندر باپ اور بیٹے میں اختلافات پیدا ہوگئے ہیں۔ جمعیت علماء اسلام (ف) کے ترجمان اسلم غوری نے کہا ہے کہ بلاول بھٹو زرداری اپنے وزیراعلیٰ مراد علی شاہ سے پوچھیں کہ اتحادی جماعتوں کے اجلاس میں انہوں نے حلقہ بندی اور مردم شماری کے حوالے سے کن امور پر اتفاق کیا تھا۔ اگر ایک ماہ الیکشن تاخیر سے ہوئے تو کوئی قیامت نہیں آجائے گی۔ اصل مقصد یہ ہے کہ الیکشن صاف شفاف اور غیر جانبدار ہوں۔ انہوں نے کہا کہ ہندوستان نے اپنے ملک کے اندر جو جی ٹوئنٹی کانفرنس کرائی ہے وہ مسئلہ کشمیر حل کئے بغیر ایک متنازعہ حیثیت اختیار کرگئی ہے۔ 76سالوں سے پاکستان اور انڈیا کے درمیان کشمیر کا مسئلہ حل طلب ہے۔ ہزاروں خاندان مکمل طور پر تباہ ہوگئے ہیں جبکہ لاکھوں افراد نے پاکستان کی سالمیت اور اس کی بقا کے لئے اپنی جانوں کا نذرانہ پیش کیا۔ انہوںنے کہا کہ ہندوستان مسئلہ کشمیر کو پس پشت ڈال کر دنیا کو اپنا چہرہ دکھانے کی کوشش کررہا ہے۔ انہوں نے کہا کہ بلاول بھٹو زرداری نے ابھی ابتدائی سیاست سیکھنا شروع کی ہے انہوں نے کوئی لاشیں نہیں اٹھائیں بلکہ ملک کے اندر ہزاروں لاشیں جے گگگیو آئی اٹھا چکی ہے۔ مولانا فضل الرحمن اور مولانا عبدالغفور حیدری پر خودکش حملے ہوئے۔ انہوں نے کہا کہ دہشت گردی کا سب سے زیادہ شکار ہماری جماعت ہوئی ہے۔ بلاول بھٹو زرداری ابھی سیاست میں نومولود ہے اسے سیاست کے دائو پیچ ابھی صحیح طرح سے نہیں آتے اپنے گھر کی لڑائی کو وہ اتحادی جماعتوں کے ساتھ شامل نہ کرے۔ سیاسی اسٹنٹ بنا کر وہ لوگوں میں ہمدریاں حاصل کرنا چاہتا ہے۔ الیکشن کا دنگل جب بجے گا تو لوگوں کو پتا چلے گا کہ اس ملک میں سب سے بڑی سیاسی جماعت کون ہے۔

کریڈٹ: انڈیپنڈنٹ نیوز پاکستان-آئی این پی