حکومت بلوچستان کا بلوچستان سپیشل ڈویلپمنٹ انیشیٹو(بی ایس ڈی آئی) صوبہ میں پائیدار ترقی کا موثر ذریعہ بن گیا، اس منصوبے کے تحت جنوبی بلوچستان کے پسماندہ اور دورافتادہ علاقوں میں بنیادی سہولیات کی فراہمی کو یقینی بنایا جا رہا ہے۔بی ایس ڈی آئی کے تحت جنوبی بلوچستان کے پانچ اضلاع کیچ، خاران، واشک، چاغی اور پنجگور میں مجموعی طور پر 137 ترقیاتی منصوبوں کیلئے پانچ ارب روپے مختص کئے گئے ہیں، ان منصوبوں کا مقصد عوامی فلاح، بنیادی ڈھانچے کی بہتری اور توانائی بحران کا حل فراہم کرنا ہے۔بلوچستان سپیشل ڈویلپمنٹ انیشیٹو کے تحت اب تک 13 ترقیاتی منصوبے کامیابی سے مکمل کیے جا چکے ہیں جبکہ دسویں منصوبے کے تحت ضلع خاران کے علاقوں مسکان، قلات اور کلی مبارک شلتاک میں دو جنازہ گاہوں کی تعمیر مکمل کر لی گئی ہے۔

گیارھویں منصوبے کے تحت ضلع واشک کے رورل ہیلتھ سینٹر ناگ میں جدید سولر سسٹم نصب کر دیا گیا ہے جس سے صحت کی سہولیات میں نمایاں بہتری آئی ہے، بارھویں منصوبے کے تحت واشک کے 10 رجسٹرڈ مدارس میں سولر سسٹمز کی تنصیب عمل میں لائی گئی جس سے توانائی بحران میں واضح کمی واقع ہوئی ہے۔اسی طرح تیرھویں منصوبے کے تحت ضلع واشک میں 40 سولر اسٹریٹ لائٹس نصب کی گئی ہیں جن سے عوامی سہولت کے ساتھ ساتھ سکیورٹی کی صورتحال میں بھی بہتری آئی ہے۔

کریڈٹ: انڈیپنڈنٹ نیوز پاکستان-آئی این پی