برسلز میں یورپی پارلیمنٹ کے سامنے پاکستانی اور کشمیری کمیونٹی کی جانب سے ایک پرامن احتجاجی مظاہرے کا انعقاد کیا گیا۔میڈیا رپورٹ کے مطابق مظاہرے کا مقصد افواجِ پاکستان سے یکجہتی کا اظہار اور بھارت کی حالیہ جارحیت اور بین الاقوامی قوانین کی خلاف ورزی کے خلاف صدائے احتجاج بلند کرنا تھا، مختلف شہروں سے تعلق رکھنے والے پاکستانیوں، کشمیریوں نے بھرپور شرکت کی اور پاکستان زندہ باد اور افواجِ پاکستان پائندہ باد جیسے نعرے لگا کر اپنے جذبات کا اظہار کیا۔مظاہرین سے خطاب کرتے ہوئے چیئرمین ای یو پاک فرینڈشپ فیڈریشن یورپ، چودھری پرویز اقبال لوسر اور کمیونٹی رہنما مہر صفدر علی نے کہا کہ پاکستان ایک پرامن ملک ہے جو ہمیشہ امن کا حامی رہا ہے، مگر ہماری خاموشی کو کمزوری نہ سمجھا جائے۔

انہوں نے جنرل سید عاصم منیر کی قیادت میں پاکستانی افواج کی جانب سے دشمن کو موثر جواب دینے اور حالیہ کامیاب آپریشنز پر انہیں خراج تحسین پیش کیا، انہوں نے کہا کہ 25 کروڑ پاکستانی اپنی افواج کے شانہ بشانہ ہیں اور ہر قربانی کے لئے تیار ہیں۔مظاہرے میں مراکش، الجزائر، ترکی، تیونس اور دیگر اسلامی ممالک کے نوجوانوں نے بھرپور انداز میں پاکستان اور افواجِ پاکستان سے اپنی والہانہ محبت کا اظہار کیا اور پاکستان زندہ باد اور افواجِ پاکستان زندہ باد کے فلک شگاف نعرے لگا کر اپنے جذبات کا بھرپور مظاہرہ کیا۔مقررین نے عالمی برادری، خصوصا یورپی یونین سے مطالبہ کیا کہ بھارت کی انسانی حقوق کی خلاف ورزیوں کا نوٹس لیا جائے اور جنوبی ایشیا میں پائیدار امن کے لئے موثر کردار ادا کیا جائے۔مظاہرے کا اختتام وطنِ عزیز کی سلامتی، ترقی اور خوشحالی کے لئے خصوصی دعائوں کے ساتھ ہوا۔

کریڈٹ: انڈیپنڈنٹ نیوز پاکستان-آئی این پی