چیئرمین سینیٹ محمد صادق سنجرانی نے لاہور میں سینیٹ کی قائمہ کمیٹی برائے کیبنٹ سیکرٹریٹ کے چیئرمین سینیٹر رانا مقبول احمد کی نمازہ جنازہ میں شرکت کی اور مرحوم کے ایصال ثواب کے لئے دعائے مغفرت کی۔چیئرمین سینیٹ نے سینیٹر رانا مقبول احمد کے پسماندگان سے دلی تعزیت اور افسوس کااظہار کرتے ہوئے کہا کہ دکھ کی اس گھڑی وہ مرحوم سینیٹرکے اہلخانہ کے غم میں برابر کے شریک ہیں۔ انہوں نے دعا کی کہ اللہ تعالی مرحوم کی مغفرت اور درجات بلند کرے اور غمز دہ خاندان کو یہ صدمہ حوصلے اور صبر سے برداشت کرنے کی توفیق عطا فرمائے۔ محمد صادق سنجرانی نے کہا کہ سینیٹر رانا مقبول احمد کی خدمات کوکبھی فراموش نہیں کر سکتے۔ ایوان بالا میں قانون سازی کے حوالے سے مرحوم سینیٹر کی خدمات قابل تحسین ہیں۔ مرحوم سینیٹر ایک قابل، محنتی، ایماندار اور حب وطن انسان تھے اور بطور سینیٹر انہوں نے متعدد اہم امور کے حوالے سے ایوان بالا میں قانونی مسودے متعارف کرائے۔ چیئرمین سینیٹ محمد صادق سنجرانی کے ہمراہ ڈپٹی چیئرمین سینیٹ مرزا محمد آفریدی،قائد حزب اختلاف سینیٹ سینیٹر ڈاکٹر شہزاد وسیم، سینیٹرمشاہد حسین سید، سینیٹررضاربانی،سینیٹرارباب عمر فاروق،سینیٹرپرنس احمد عمر احمد زئی،سینیٹرعبدالقادر، سینیٹرنصیب اللہ بازئی،سینیٹرعرفان صدیقی،سینیٹرفیصل سلیم رحمان،سینیٹرحاجی ہدایت اللہ،سینیٹرڈاکٹر آصف سعید کرمانی اور نعمان خان بھی موجود تھے۔

کریڈٹ: انڈیپنڈنٹ نیوز پاکستان-آئی این پی