پاکستان میں چینی سفارتخانے نے چائنا اوورسیز پورٹ ہولڈنگ کمپنی (سی او پی ایچ سی )کے ساتھ مل کر حال ہی میں چائنا پاکستان گورنمنٹ گرلز مڈل سکول فقیر کالونی گوادر کی تزئین و آرائش کا کام مکمل کیا ہے۔ اسکول کے ایڈمنسٹریٹر نسیم بلوچ نے گوادر پرو کو بتایا کہ اسکول کی دو عمارتیں جو بالترتیب 2016 اور 2020 میں تعمیر کی گئی تھیں، کی مرمت اور تزئین و آرائش کی گئی تاکہ طلبا کو بہتر تعلیمی ماحول فراہم کیا جاسکے۔ اسکول کے کچھ حصوں میں بلاتعطل بجلی کی فراہمی کے لئے شمسی پینل بھی نصب کیے گئے تھے۔ انہوں نے کہا کہ مرمت اور تزئین و آرائش سے بچوں کے لئے ایک محفوظ ، فعال اور متاثر کن جگہ پیدا ہوگی جبکہ تدریس اور سیکھنے کے موثر ماحول کو فروغ ملے گا۔ گوادر پرو کے مطابق نسیم کو امید تھی کہ اس سال اسکول کو مڈل سے ہائی اسکول میں اپ گریڈ کیا جائے گا۔ انہوں نے نوٹ کیا کہ اسکول میں اعلی ثانوی اسکول میں تبدیل کرنے کے لئے کافی رقبہ اور سہولیات موجود ہیں۔ انہوں نے کہا کہ ہمارے پاس 18 کلاس روم اور کل 30 کمرے ہیں، جس میں ایک کمپیوٹر لیب اور لائبریری بھی شامل ہے۔ ایک بار اسکول کو اپ گریڈ کرنے کے بعد، پسماندہ لڑکیاں کم از کم ہائی اسکول کی سطح تک اپنی تعلیم جاری رکھ سکتی ہیں۔ انہوں نے مزید کہا کہ اس وقت گوادر میں چین کی مالی اعانت سے چلنے والا مڈل اسکول گوادر میں 560 نوجوان لڑکیوں اور لڑکوں کو مفت تعلیم فراہم کر رہا ہے۔ گوادر پرو کے مطابق اگست 2016 میں قائم ہونے والا یہ اسکول چین اور پاکستان کے درمیان پائیدار دوستی کی ایک روشن مثال کے طور پر کھڑا ہے۔

کریڈٹ: انڈیپنڈنٹ نیوز پاکستان-آئی این پی