فیلڈ مارشل سید عاصم منیر کی بطور چیف آف ڈیفنس فورسز تعیناتی اور ایئر چیف مارشل ظہیر احمد بابر سدھو کی مدت ملازمت میں توسیع کے الگ الگ نوٹیفکیشن جاری کرد ئیے گئے ۔ صدر مملکت آصف علی زرداری کی منظوری کے بعد وزارت دفاع نے فیلڈ مارشل سید عاصم منیر کی بطور چیف آف ڈیفنس فورسز تعیناتی کا نوٹیفکیشن جاری کردیا۔ فیلڈ مارشل سید عاصم منیر چیف آف آرمی اسٹاف کے ساتھ چیف آف ڈیفنس فورسز بھی ہوں گے۔ نوٹیفکیشن آئین پاکستان کی شق 243 اور آرمی ایکٹ کی شق 8 اے کے تحت جاری کیا گیا۔نوٹیفکیشن کے مطابق فیلڈ مارشل سید عاصم منیر کی بطور چیف آف ڈیفنس فورسز تعیناتی 5 سال کیلئے کی گئی ہے۔

دریں اثنا وزارتِ دفاع نے صدرِ مملکت کی منظوری کے بعد ایئر چیف مارشل ظہیراحمد بابر سدھو کی مدت ملازمت میں توسیع کا نوٹیفکیشن بھی جاری کردیا گیا ، توسیع کا اطلاق 19 مارچ 2026 سے ہوگا۔ایئر چیف مارشل ظہیر احمدبابرکی بطور سربراہ پاک فضائیہ مدت میں2 سال کی توسیع کی گئی۔ یہ نوٹیفکیشن آئین پاکستان کی شق 243 اور ایئر فورس ایکٹ کی شق 10-B کے تحت جاری کیا گیا ہے۔ یاد رہے کہ گزشتہ روز صدر مملکت آصف علی زرداری نے وزیراعظم شہباز شریف کی ارسال کردہ فیلڈ مارشل عاصم منیر کی بطور آرمی چیف و چیف آف ڈیفنس فورسز تعیناتی کی سمری منظور کی۔وزیراعظم شہباز شریف نے فیلڈمارشل سید عاصم منیر کی بطور آرمی چیف و چیف آف ڈیفنس فورسز تعیناتی کی منظوری دیتے ہوئے سمری صدر مملکت کو ارسال کی تھی۔

کریڈٹ: انڈیپنڈنٹ نیوز پاکستان-آئی این پی