اقوام متحدہ میں پاکستان کے مستقل مندوب عاصم افتخار احمد نے کہا ہے کہ فلسطینی عوام کو حق خود ارادیت حاصل ہے اور پاکستان ان کے ساتھ کھڑا ہے۔اپنے ایک بیان میں عاصم افتخار احمد نے کہاہے کہ پاکستان نے فلسطین کے مسئلے کے پرامن حل اور دو ریاستی حل کے نفاذ سے متعلق نیو یارک اعلامیہ کے حق میں ووٹ دیا ہے۔ یہ اعلامیہ حال ہی میں نیویارک میں 28 تا 30 جولائی 2025 منعقدہ اعلی سطحی بین الاقوامی کانفرنس کے نتیجے میں منظور کیا گیا۔پاکستانی مندوب نے کہا کہ اس اقدام کے ذریعے پاکستان نے فلسطین کے مسئلے پر اپنی دیرینہ اور اصولی پوزیشن کو دہرا دیا، پاکستان اس بات پر یقین رکھتا ہے کہ فلسطینی عوام کو حق خود ارادیت حاصل ہے اور وہ ایک آزاد، قابل عمل اور متصل فلسطینی ریاست قائم کریں جس کی سرحدیں 1967 سے پہلے کی بنیاد پر ہوں اور جس کا دارالحکومت القدس الشریف ہو، یہ موقف اقوام متحدہ کی قراردادوں اور بین الاقوامی قانون کے عین مطابق ہے۔سفیر عاصم افتخار نے مزید کہا ہے کہ "نیو یارک اعلامیہ" کی توثیق اس حقیقت کی غمازی کرتی ہے کہ پاکستان ہمیشہ ایک منصفانہ اور پائیدار امن کے قیام کے لئے پرعزم رہا ہے۔پاکستان نے غزہ میں جاری اسرائیلی جارحیت کی بھی شدید مذمت کی ہے جس کے نتیجے میں 64 ہزار سے زائد بے گناہ فلسطینی جاں بحق ہوچکے ہیں، پاکستان نے عالمی برادری سے مطالبہ کیا ہے کہ فلسطینی عوام کے حق میں آواز بلند کی جائے اور خطے میں ایک منصفانہ امن کے لئے موثر اقدامات کئے جائیں۔

کریڈٹ: انڈیپنڈنٹ نیوز پاکستان-آئی این پی