پاکستان نیاقوام متحدہ میں بھارتی الزامات پر دوٹوک جواب دیتے ہوئے کہا ہے کہ بھارت میں مسلمان، مسیحی، سکھ اور دلت برادریاں ظلم و تشدد کا شکار ہیں،فسطائی ہندوتوا سوچ نے بھارت کو نفرت کی فیکٹری بنادیا ہے،بھارت نے مسئلہ کشمیرسلامتی کونسل میں اٹھایا اوراب وعدوں سے منحرف ہو گیا، اقوام متحدہ کے قیام کا نظریہ آج غیر معمولی آزمائش کا شکار ہے ،پاکستان اقوام متحدہ کے بیان کردہ مقاصد پر مبنی عالمی نظام کیلئے پرعزم ہے۔ ان خیالات کااظہار اقوام متحدہ میں پاکستان کے مستقل مندوب عاصم افتخار اور پاکستانی قونصلرگل قیصرسروانی نے اقوام متحدہ میں اپنے خطاب میں کیا ۔ مستقل مندوب عاصم افتخار نے کہا کہ اقوام متحدہ کے قیام کانظریہ آج غیرمعمولی آزمائش کاشکارہے۔انہوں نے کہا کہ پاکستان اقوام متحدہ کے بیان کردہ مقاصد پر مبنی عالمی نظام کیلئے پرعزم ہے، پاکستانی مندوب نے کہا کہ جموں وکشمیرکاتنازع کونسل کے ایجنڈے پرسب سے پرانامسئلہ ہے۔عاصم افتخار نے کہا کہ فلسطینی عوام کی طویل اذیت واضح علامت ہے کہ مسئلے کاپائیدار حل ضروری ہے،انہوں نے کہا کہ آرٹیکل 25کے تحت سلامتی کونسل کے فیصلوں پر عمل لازم ہے، فیصلے نظرانداز کرنے سے کثیرالجہتی نظام پر اعتماد کمزور ہو رہا ہے، پائیدار امن کیلئے اجتماعی کاوشیں ضروری ہیں۔دوسری جانب پاکستانی قونصلرگل قیصرسروانی نے بھارتی چہرہ بے نقاب کرتے ہوئے کہا کہ گجرات، دہلی اور منی پور کے قتل عام بھارت کے چہرے پربدنما داغ ہیں۔

پاکستانی قونصلر نے کہا کہ کشمیر بھارت کا اندرونی معاملہ نہیں بلکہ بین الاقوامی طورپرتسلیم شدہ متنازعہ علاقہ ہے، جنوبی ایشیا کا زخم آج بھی جموں و کشمیر ہے جس سے خون رس رہا ہے ۔کشمیر کا معاملہ بھارت نے ہی سلامتی کونسل میں پیش کیا تھا، بھارت نے رائے شماری کے وعدے سے انحراف کیا اور فوجی قبضہ مسلط کیا۔بھارت نے ایک قوم کو دبانے کیلئے 9 لاکھ فوج تعینات کر رکھی ہے،یہ ہمارے عہد کی سب سے بڑی فوجی قبضے کی مثال ہے،بھارتی زیرقبضہ کشمیر میں انسانی حقوق کی سنگین خلاف ورزیاں ہو رہی ہیں۔قیصر سروانی نے کہا کہ مقبوضہ کشمیرمیں اجتماعی قبریں، جبری گمشدگیاں اورقتل عام جاری ہے، اقوام متحدہ کی دستاویزات کشمیرکومتنازعہ تسلیم کرتی ہیں، بھارت ریاستی دہشتگردی ختم کرے اور سلامتی کونسل کی قراردادوں پر عمل کرے۔انہوں نے کہا کہ کشمیری عوام اپنی جدوجہد پرثابت قدم اور حق پرہیں، آزادجموں و کشمیر پاکستان کے جمہوری عزم اور آزادیوں کی علامت ہے۔، کشمیری عوام کی جدوجہد جائز ہے، وہ نہ جھکے ہیں نہ جھکیں گے، آزاد جموں و کشمیر پاکستان کے جمہوری عزم اور بنیادی آزادیوں کی علامت ہے، انہوں نے عالمی برادری سے مطالبہ کیا کہ وہ بھارت سے یواین چارٹر اور قراردادوں پر عمل کرائے۔انہوں نے کہا کہ بھارت کو سلامتی کونسل کی قراردادوں پر عمل درآمد کرنا چاہیے انھوں نے مزید کہا کہ ہندوتوا کی فسطائی سوچ نے بھارت کو نفرت کی فیکٹری بنا دیا ہے۔

کریڈٹ: انڈیپنڈنٹ نیوز پاکستان-آئی این پی