گیلپ پاکستان کے حالیہ سروے پر خیبرپختونخوا اور پنجاب کے سیاسی رہنمائوں میں زبانی جنگ شدت اختیار کر گئی۔ خیبرپختونخوا کے مشیر اطلاعات بیرسٹر محمد علی سیف نے سروے کو مسترد کرتے ہوئے اسے حکومت کا تیار کردہ سیاسی اسکرپٹ قرار دے دیا جبکہ وزیر اطلاعات پنجاب عظمی بخاری نے شدید ردعمل دیتے ہوئے کہا کہ خیبرپختونخوا حکومت اب سچ برداشت نہیں کر پا رہی۔بیرسٹر سیف نے اپنے بیان میں کہا کہ گیلپ سروے مور کے منہ میں سانپ ہے اور مریم نواز گیلپ کے منہ میں بیٹھ کر زہر اگل رہی ہیں۔ ان کا مزید کہنا تھا کہ گیلپ کا فارم سینتالیس (فارم 47) حکومتوں کے اشاروں پر تیار کردہ ایک سیاسی اسکرپٹ ہے جس کا حقیقت سے کوئی تعلق نہیں۔ انہوں نے تنقید کرتے ہوئے کہا کہ گیلپ کو سندھ کے کچے کے علاقے میں ڈاکو راج اور کراچی کی صفائی پر عوامی رائے بھی لینی چاہیے تھی۔

دوسری جانب وزیر اطلاعات پنجاب عظمی بخاری نے بیرسٹر سیف کے بیان کو سیاسی بوکھلاہٹ قرار دیا۔ انہوں نے کہا خیبرپختونخوا کو کسی سروے کی ضرورت نہیں، وہاں کی حالت خود چیخ چیخ کر سب کچھ بتا رہی ہے۔ انہوں نے طنز کیا کہ جو لوگ کل تک گیلپ سروے پر بھنگڑے ڈال رہے تھے، آج اپنی کارکردگی پر رپورٹ آئی تو برا لگنے لگا۔عظمی بخاری نے کہا کہ گیلپ سروے دراصل بارہ سالہ جعلی تبدیلی کے منہ پر طمانچہ ہے۔ انہوں نے دعوی کیا کہ خیبرپختونخوا کے 73 فیصد عوام نے گنڈا پور حکومت کو چارج شیٹ کیا ہے اور 71 فیصد عوام کرپشن کی شفاف تحقیقات چاہتے ہیں۔گیلپ پاکستان کے اس سروے کے بعد ملک بھر میں سیاسی درجہ حرارت مزید بڑھ گیا ہے ۔

کریڈٹ: انڈیپنڈنٹ نیوز پاکستان-آئی این پی