گلوکارہ روشن آرا ء بیگم کی41ویں برسی 6دسمبر کو منائی جائے گی۔ روشن آرا ء بیگم 1917 کو بھارت کے شہر کلکتہ میں استاد عبدالحق خان کے گھر میں پیدا ہوئیں اوران کا اصل نام وحید النسا ء بیگم تھا۔ انہوں نے موسیقی کی تعلیم اپنے قریبی عزیز استاد عبدالکریم خان سے حاصل کی جن کی وساطت سے ان کا تعلق موسیقی کے کیرانا گھرانے سے بنتا ہے۔وہ استاد عبدالکریم سے 15سال تک موسیقی کی تعلیم حاصل کرتی رہیں اور انہوںنے آل انڈیا ریڈیو سے گانے شروع کیے۔ بعد ازاں پاکستا ن آکر لالہ موسی میں رہائش اختیار کی،وہ لالہ موسی سے ریڈیو پاکستان لاہور مرکز میں گانے کے لئے آتی تھیں ان کے گائے ہوئے گانے ریڈیو پاکستان میں آج بھی محفوظ ہیں۔ انہوں نے بطور گلوکارہ پہلی نظر، جگنو، قسمت، روپ متی،باز،بہادر اور نیلا پربت سمیت سیکڑوں فلموں میں گانے گا کر بھرپور شہرت حاصل کی۔ انہیں ملکہ موسیقی کے خطاب سے نوازا گیا، انہیں پرائیڈ آف پرفارمنس اورستارہ امتیاز سے بھی نوازا گیا۔وہ 6دسمبر کو 65سال کی عمر میں انتقال کر گئی تھیں۔

کریڈٹ: انڈیپنڈنٹ نیوز پاکستان-آئی این پی