وزیر دفاع خواجہ آصف نے کہا ہے کہ حالیہ سیلاب کو بھارتی آبی جارحیت نہیں کہہ سکتا بھارت نے پروٹوکول کے مطابق دوبار سیلاب کی پیشگی اطلاع دی۔ایک انٹرویو میں خواجہ آصف نے کہا کہ بھارت نے سیلاب سے متعلق 2 بار اطلاع دی ہے ۔بھارت ہمیشہ سے ہی سیلاب کی پیشگی اطلاع دیتا رہا ہے بھارت بعض اوقات عین سیلاب کے وقت وارننگ دیتا ہے۔خواجہ آصف نے کہا کہ سیلابی ریلوں سے متعلق بھارت کی شرارت کے کوئی ثبوت نہیں بھارت نے اس بار ڈیم سے پانی ریلیز کرنے کے بعد بھی بتایا ہم بھی ڈیم سے پانی ریلیز کرتے ہیں اگر نہ کریں تو آبادی کو خطرہ ہوتا ہے۔ان کا کہنا تھا کہ شہری آبادی میں 50 سال بعد اس طرح کی شدید بارش ہوئی ہے ہمارے ہاں آبی گزرگاہوں پر تجاوزات بہت زیادہ ہیں، سیالکوٹ کے وسط سے گزرنے والے نالے پر تجاوزات ہیں ان کے دونوں طرف فیکٹریاں ہیں، دریائوں اور نالوں کے کنارے پر تجاوزات نہیں ہونی چاہیے اگر چاہیں تو تجاوزات 3 دن میں ختم کر سکتے ہیں، شہری آبادی میں تجاوزات کے خاتمے کیلئے سروے شروع کر رہے ہیں۔وزیر دفاع نے مزید کہا کہ سرکاری زمین پر پیشہ ور لوگ غیرقانونی تعمیرات کرتے ہیں سرکاری زمینوں کی لوٹ مار لگی ہوئی ہے ہر کوئی قبضہ کرلیتا ہے بارشوں کے بعد تجاوزات کیخلاف کارروائی کی جائے گی۔

کریڈٹ: انڈیپنڈنٹ نیوز پاکستان-آئی این پی