وفاقی حکومت نے حج 2026 کیلئے ڈاکٹرز اور پیرامیڈیکس کی بھرتیوں کا آغاز کردیا۔ میڈیا رپورٹس کے مطابق آئندہ سال حج کے دوران عازمین کو بہترین طبی سہولیات فراہم کرنے کیلئے وزارت مذہبی امور نے ڈاکٹروں اور پیرامیڈیکس سٹاف کی عارضی بھرتیاں شروع کردی ہیں، وزارت نے عارضی بنیاد پر طبی عملے کی خدمات حاصل کرنے کیلئے اشتہار جاری کردیا، جس میں درخواست دہندگان کیلئے واضح شرائط بیان کی گئی ہیں۔اس ضمن میں جاری کردہ حکومتی اشتہار میں کہا گیا ہے کہ حج مشن کیلئے 98 ڈاکٹرز اور فارماسسٹ، 196 پیرامیڈیکس سٹاف کی ضرورت ہے، امیدواروں کا ذہنی اور جسمانی طور پر فٹ ہونا ضروری ہے، ملازمت کے خواہشمند امراض قلب، شوگر یا ہائی بلڈ پریشر کے مریض نہ ہوں، بھرتی کیلئے ڈسٹرکٹ ہیڈ کوارٹر ہسپتال کا فٹنس سرٹیفکیٹ لازمی ہے، حج میڈیکل عملے کیلئے عمر کی حد 25 سے 55 سال رکھی گئی ہے۔

بتایا گیا ہے کہ حج مشن میں بھرتی کیلئے صرف ایسے سرکاری ملازمین اہل ہوں گے جو کم از کم تین سال حاضری کے ساتھ خدمات انجام دے چکے ہوں، ریٹائرڈ اہلکار اس بھرتی کیلئے اہل نہیں ہوں گے، درخواستیں 2 دسمبر 2025 تک دی جا سکتی ہیں، انتخاب کیلئے این ٹی ایس کے ذریعے تحریری امتحان لیا جائے گا، جس کے ساتھ منتخب افراد کو تمام متعلقہ دستاویزات فراہم کرنا ہوں گی۔ رپورٹ کے مطابق وفاقی حکومت کی پالیسی کے تحت حج میڈیکل مشن میں خواتین کیلئے 30 فیصد کوٹہ مخصوص کیا گیا ہے، منتخب طبی اہلکار حج کے دوران حجاز مقدس میں ڈیوٹی انجام دیں گے، سعودی قوانین کی خلاف ورزی یا ڈسپلن کی خلاف ورزی پر انہیں فوری طور پر پاکستان واپس بھیج دیا جائے گا، یہ اقدام عازمین حج کی صحت و حفاظت کو یقینی بنانے کے لیے انتہائی ضروری قرار دیا گیا ہے۔

کریڈٹ: انڈیپنڈنٹ نیوز پاکستان-آئی این پی