وفاقی حکومت نے عالمی مالیاتی فنڈ (آئی ایم ایف)کی ایک اور شرط پوری کرتے ہوئے چینی (شوگر سیکٹر)سے متعلق اہم فیصلہ کر لیا۔ میڈیا رپورٹ کے مطابق ذرائع نے بتایا کہ حکومت نے آئی ایم ایف کی شرط پر شوگر سیکٹر میں حکومتی مداخلت ختم کرنے کی تیاری کرتے ہوئے شعبے کو ڈی ریگولیٹ کرنے کا فیصلہ کیا ہے۔شوگر انڈسٹری مکمل طور پر ڈی ریگولیٹ کی جائے گی جس کیلیے تجاویز تیار کر لی گئیں۔ذرائع وزارت صنعت و پیداوار کے مطابق حکومت صرف 5 لاکھ ٹن چینی کا بفر اسٹاک رکھے گی جبکہ اس کے علاوہ مداخلت نہیں کرے گی۔ذرائع نے بتایا کہ شراکت داروں کے ساتھ مشاورت سے تجاویز کا فائنل ڈرافٹ آئندہ ہفتے وزیر اعظم شہباز شریف کو پیش کیا جائے گا۔

حکومت ٹریڈنگ کارپوریشن آف پاکستان کے پاس ایک ماہ کی کھپت کے برابر بفر اسٹاک رکھے گی۔ڈرافٹ میں تجویز دی گئی ہے کہ ڈی ریگولیٹ کرنے پر قیمتیں کنٹرول نہ ہوئی تو بسپ سبسڈی کا حجم بڑھایا جا سکتا ہے، چینی سرپلس ہونے پر برآمد ہوگی تو کسان کو گنے کے بہتر دام مل سکیں گے۔پیداواری صلاحیت بڑھانے کیلیے شوگر ملز کو 50 فیصد سے بڑھا کر 70 فیصد تک چلایا جائے گا۔ شوگر ملز کو پوری صلاحیت پر چلا کر گنا استعمال کرنے سے 2.5 ملین ٹن اضافی چینی پیدا کی جا سکے گی۔ڈرافٹ میں تجویز ہے کہ کھپت کے علاوہ اضافی چینی کو برآمد کر کے 1.5 ارب ڈالر کا زرمبادلہ کمایا جا سکتا ہے، ایک ماہ کی کھپت کے برابر ٹی سی پی کے ذریعے بفر اسٹاک ہولڈ کے علاوہ باقی چینی نجی شعبہ ڈیل کرے گا۔

کریڈٹ: انڈیپنڈنٹ نیوز پاکستان-آئی این پی