پاکستان پیپلزپارٹی اور مسلم لیگ(ن)کی جانب سے حکومت سازی پر اتفاق کے بعد بدھ کو اسٹاک ایکسچینج میں زبردست تیزی کا رجحان دیکھنے میں آ یا ، بینچ مارک کے ایس ای-100 انڈیکس 965 پوائنٹس بڑھ گیا۔ پی ایس ایکس ویب سائٹ کے مطابق بدھ کی صبح تقریبا 9 بج کر 49 منٹ پر کے ایس ای-100 انڈیکس 965 پوائنٹس یا 1.6 فیصد اضافے کے بعد 61 ہزار 429 تک جا پہنچا، جو گزشتہ روز 60 ہزار 464 پر بند ہوا تھا۔ ٹاپ لائن سیکیورٹیز کے چیف ایگزیکٹیو محمد سہیل نے بتایا کہ سیاسی جماعتوں کے درمیان حکومت کی تشکیل پر اتفاق کی خبروں کے بعد مارکیٹ میں تیزی دیکھی گئی ہے۔ اکثیر ریسرچ کے ڈائریکٹر اویس اشرف نے بھی انہی خیالات کا اظہار کرتے ہوئے کہا کہ سیاسی جماعتوں کے درمیان اتفاق کے بعد نئی حکومت کی تشکیل کے حوالے سے صورتحال واضح ہونے پر سرمایہ کاروں کا اعتماد بحال ہوا ہے۔

کریڈٹ: انڈیپنڈنٹ نیوز پاکستان-آئی این پی