بانی پی ٹی آئی عمران خان کی بہن علیمہ خان نے کہا ہے کہ یہ لوگ عمران خان کوایک اور مقدمے میں سزا سنانے جا رہے ہیں،جیل میں توشہ خانہ ٹو کیس کی سماعت جلدی میں کی جارہی ہے، عمران خان کو بھی معلوم ہے کہ انہیں سزا سنائی جانی ہے ۔اڈیالہ جیل کے باہر میڈیا سے گفتگو کرتے ہوئے علیمہ خان کا کہنا تھا میں آج بھی مین اسٹریم میڈیا سے بات نہیں کروں گی، کیونکہ کیمروں کے سامنے تین چار پلانٹڈ لوگوں کو بدتمیزی کے لئے بھیجا جا رہا ہے۔ان کا کہنا تھا میں نہیں چاہتی کہ پھر ان کو بدتمیزی کا موقع ملے، ہمارے کارکن پھر اشتعال میں آئیں گے اور گرفتاریاں ہوں گی، دو سال سے میڈیا یہاں کوریج کر رہا ہے کسی نے بد تمیزی نہیں کی، اب پلانٹڈ لوگوں کو ماحول خراب کرنے کے لئے بھیجا جا رہا ہے، میرے خلاف اور کارکنان کے خلاف ایک اور مقدمہ درج کیا گیا ہے۔علیمہ خان نے کہا کہ جیل میں توشہ خانہ ٹو کیس کی سماعت جلدی میں کی جارہی ہے، یہ لوگ عمران خان کوایک اور مقدمے میں سزا سنانے جارہے ہیں، بانی پی ٹی آئی کو بھی معلوم ہے سزا سنائی جانی ہے۔

کریڈٹ: انڈیپنڈنٹ نیوز پاکستان-آئی این پی