پنجاب سمیت ملک بھر میں یومِ شہدا پولیس 4 اگست کو انتہائی عقیدت و احترام سے منایا گیا۔اس موقع پر شہدا کی قبروں پر گارڈ آف آنر پیش کیا گیا ، ان کے درجات کی بلندی کے لیے فاتحہ خوانی اور خصوصی دعائیں کی گئیں۔ مساجد میں قرآن خوانی کا اہتمام کیا گیا ہے، جبکہ سینئر پولیس افسران شہدا کے اہلخانہ سے ملاقاتیں کیں اور ان کی لازوال قربانیوں کو خراجِ تحسین پیش کیا ۔ اس موقع پر انسپکٹر جنرل (آئی جی) پنجاب ڈاکٹر عثمان انور نے پنجاب پولیس کے شہدا کو زبردست خراجِ عقیدت پیش کرتے ہوئے کہا ہے کہ وطن عزیز کی خاطر اپنی جانوں کا نذرانہ پیش کرنے والے پنجاب پولیس کے عظیم سپوت ہمارے ہیرو ہیں، جنہیں پوری قوم سلام پیش کرتی ہے۔آئی جی پنجاب نے کہا کہ اپنے لختِ جگر وطن پر قربان کرنے والی ماں کو بھی میرا سلام ہے، جنہوں نے اس قوم کو ایسے عظیم بیٹے دیے۔ انہوں نے مزید بتایا کہ پنجاب پولیس کے 1700 سے زائد بہادر افسران و جوانوں نے دہشت گردی کے خاتمے، امن و امان کے قیام اور جرائم کے خلاف جنگ میں اپنی قیمتی جانوں کا نذرانہ پیش کیا۔ڈاکٹر عثمان انور نے کہا کہ یومِ شہدا پولیس، شہدا کے ساتھ تجدیدِ عہد کا دن ہے، اور زندہ قومیں کبھی اپنے ہیروز کو فراموش نہیں کرتیں۔ انہوں نے عزم ظاہر کیا کہ شہدا کے اہلخانہ کی بہترین فلاح و بہبود اور دیکھ بھال ان کی اولین ترجیح ہے۔

کریڈٹ: انڈیپنڈنٹ نیوز پاکستان-آئی این پی