پیٹرن انچیف استحکام پاکستان پارٹی و ترین ایجوکیشن فانڈیشن کے بانی جہانگیر خان ترین نے فیصل آباد کے علاقوں جڑانوالہ اور کھڑیانوالہ کے دو سرکاری سکولوں میں آئی ٹی کی تعلیم اور کمپیوٹر لیبز کو اپ گریڈ کرنے کے لیے 1 کروڑ روپے فراہم کر دیے. ان سکولز میں 6,200 سے زائد طالبات تعلیم حاصل کر رہی ہیں۔ڈپٹی کمشنر فیصل آباد عبداللہ نئیر شیخ نے ترین ایجوکیشن فانڈیشن کے چیف ایگزیکٹو آفیسر اکبر خان کے ساتھ 3 سالہ معاہدے پر دستخط کیے۔ اس موقع پر ایڈیشنل ڈپٹی کمشنر شہاب اسلم اور محکمہ تعلیم فیصل آباد کے چیف ایگزیکٹو آفیسر کاشف ضیا بھی موجود تھے.دونوں سکولز کی انتظامیہ کی جانب سے جہانگیر خان ترین کی اس کاوش پر اظہار تشکر کیا گیا. ترین ایجوکیشن فانڈیشن کے چیف ایگزیکٹو آفیسر اکبر خان کی جانب سے انتظامیہ کو یقین دہانی کروائی گئی کہ فوری طور پر آئی. ٹی لیبز پر کام شروع ہو جائے گا اور دسمبر 2023 سے پہلے اسے مکمل کر لیا جائے گا. اکبر خان نے مزید کہا کہ جہانگیر خان ترین کے ویژن کے مطابق یہاں کے بچوں کو اعلی معیار کی جدید تعلیمی سہولیات فراہم کی جائیں گی۔ واضح ہے کہ جہانگیر ترین نے گزشتہ ماہ سانحہ جڑانوالہ کے متاثرین سے ملاقات اور انکی ہر ممکن مدد کی یقین دہانی کے ساتھ ساتھ ایک کروڑ روپے کی فراہمی کا بھی اعلان کیا تھا۔

کریڈٹ: انڈیپنڈنٹ نیوز پاکستان-آئی این پی