بانی پاکستان تحریک انصاف کے کیسز سننے والے جج محمد بشیر کی ریٹائرمنٹ تک رخصت کی درخواست مسترد کر دی گئی۔ احتساب عدالت اسلام آباد کے جج محمد بشیر کے رخصت پر جانے کے معاملے میں وزارت قانون و انصاف کی جانب سے ان کی درخواست منظور نہیں کی گئی جس کے بعد جج محمد بشیر نے ریٹائرمنٹ تک چھٹی کے لیے دی گئی اپنی درخواست واپس لے لی۔ جج محمد بشیر نے طبیعت کی ناسازی کے باعث 24 جنوری سے 14 مارچ تک رخصت کی درخواست دی تھی، وزارت قانون نے رخصت کی درخواست منظور نہیں کی جس کی وجہ سے درخواست واپس لی گئی۔ یاد رہے کہ جج محمد بشیر کی عدالت میں بانی پی ٹی آئی اور بشری بی بی کے خلاف 2 ریفرنسز زیر سماعت ہیں جب کہ وہ مدت ملازمت مکمل ہونے پر 14 مارچ 2024 کو ریٹائر ہو رہے ہیں۔

کریڈٹ: انڈیپنڈنٹ نیوز پاکستان-آئی این پی