جہلم میں نالہ بنہاں میں بہہ کر شہید ہونے والے پولیس اہلکار حیدر علی کی نمازجنازہ اداکردی گئی ۔حیدرعلی امدادی کارروائیوں میں مصروف تھا، شہید اہلکار حیدر علی کی نماز جنازہ پولیس لائنز جہلم میں ادا کی گئی، وزیر مملکت بلال اظہر کیانی اور عسکری و سول قیادت نے شرکت کی، پولیس کے دستے نے شہید کو سلامی بھی پیش کی، شہید کانسٹیبل حیدر علی 6 بہنوں کا اکلوتا بھائی تھا۔پاک فوج کا جہلم اور گردونواح میں سیلاب متاثرہ علاقوں میں ریسکیو آپریشن جاری رہا۔ دریں اثنا وزیراعظم شہباز شریف نے شہید کانسٹیبل حیدر علی کو خراج عقیدت پیش کرتے ہوئے کہا حیدر علی نے اپنی جان کی پرواہ نہ کرتے ہوئے کئی لوگوں کو سیلابی پانی سے ریسکیو کیا، حیدر علی شہید پر پوری قوم کو فخر ہے،حیدر علی شہید کے اہل خانہ کی فلاح و بہبود کیلئے ہر ممکن اقدامات اٹھائے جائیں گے۔ وزیرداخلہ محسن نقوی نے کانسٹیبل حیدر علی کو خراج عقیدت پیش کرتے ہوئے کہا حیدر علی نے اپنی جان نچھاور کر کے فرض شناسی کی اعلی مثال قائم کی، شہید کانسٹیبل قوم کا ہیرو ہے جس نے فرض پر آنچ نہیں آنے دی۔ وزیر مملکت بلال اظہر کیانی نے کہا حیدر علی شہید ایثار و قربانی کی تابندہ مثال ہے،شہدا پیکیج کے تحت شہید کے اہل خانہ کی مالی کفالت کی جائے گی۔

کریڈٹ: انڈیپنڈنٹ نیوز پاکستان-آئی این پی