وفاقی وزیراطلاعات عطا اللہ تارڑ نے کہا ہے کہ جنرل عاصم ملک کو مشیر قومی سلامتی مقرر کرنا وقت کی ضرورت اور حکومت کا اچھا اقدام ہے،ان کی تعیناتی سے بین الاقوامی سطح پرسکیورٹی معاملات کو مزید تقویت ملے گی اور پاکستان کا کیس مزید مضبوطی سے لڑا جائے گا۔ ایک انٹرویو میں انہوں نے کہا کہ پاکستان اور امریکا کے درمیان روابط ہوتے رہتے ہیں، نائب وزیراعظم اسحاق ڈار کا بھی رابطہ رہتا ہے۔امریکی وزیرخارجہ کا وزیراعظم سے بات کرنا کوئی اچنبے کی بات نہیں ، ٹرمپ انتظامیہ کے ساتھ ہمارے اچھے تعلقات ہیں، ٹرمپ نے بھی کہا کہ ہمارے دونوں ممالک کے ساتھ اچھے تعلقات ہیں۔ بھارت نے ہمیشہ ایسے واقعات کو بنیاد بنا کر پاکستان پر حملہ کیا۔ماضی میں بھی پوری دنیا کے سامنے ہے جب پاکستان نے ان کے جہاز گرائے اور ابھی نندن کو گرفتار کیا۔ بھارت کی طرف سے ہمیشہ کوئی نہ کوئی شرارت ہوتی ہے۔ اس کا امکان رہتا ہے کہ بھارت کوئی نہ کوئی ڈس ایڈونچر کرے گا، پاکستان کسی بھی ایڈونچر کو ڈیل کرنا خوب جانتا ہے۔ عطا تارڑ نے کہا کہ دوست ممالک جن کو علاقائی اور عالمی امن کے حوالے سے تشویش ہے، ہم نے ان کے سامنے بھی اپنا مئوقف رکھا کہ بھارت نے کس طریقے سے بغیر ثبوت الزام لگا کر پاکستان کو موردالزام ٹھہرایا۔جبکہ پاکستان کا دور دور تک کوئی تعلق نہیں ہے۔

تمام عالمی میڈیا کہہ رہا ہے کہ بھارت نے بغیر ثبوت پاکستان پر پہلگام واقعے کا الزام لگایا ہے۔ بھارت کی کوشش تھی کہ پاکستان پر الزام لگا کر کوئی نہ کوئی ڈس ایڈونچر کیا جائے۔ پاکستان نے غیرجانبدار تحقیقات کا عندیہ دیا ہے، پاکستان نے تحقیقات کا مطالبہ کرکے بتایا ہے کہ پاکستان کے پاس چھپانے کو کچھ نہیں ہے۔لیکن بھارت نے اس کا کوئی جواب نہیں دیا۔ دنیا میں اقوام متحدہ سے لے کر مختلف فورم موجود ہیں ،ایسا فورم جس پر کوئی سوال نہ اٹھا سکے۔ ایسے کسی فورم سے تحقیقات کرائی جاسکتی ہیں۔ ایف آئی آر کو دیکھ لیں 2 بج کر 20منٹ پر واقعہ ختم ہوا اور 2 بج کر 30منٹ پر ایف آئی آر ہوجاتی ہے۔ عطاتارڑ نے کہا کہ اس وقت پاکستان کی سلامتی کا مسئلہ ہے تو جنرل عاصم ملک بڑے قابل افسر ہیں، قومی سکیورٹی ایشوز پر پی ایچ ڈی کی ہوئی ہے۔لیفٹیننٹ جنرل عاصم ملک کو مشیر قومی سلامتی مقرر کرنا وقت کی ضرورت ہے،موجودہ بین الاقوامی سکیورٹی صورتحال اور معاملات کو مزید تقویت ملے گی۔جنرل عاصم ملک کی تعیناتی حکومت کا اچھا اقدام ہے، پاکستان کا کیس مزید مضبوطی سے لڑا جائے گا۔

کریڈٹ: انڈیپنڈنٹ نیوز پاکستان-آئی این پی