خیبر پختونخوا حکومت کے ہیلی کاپٹر کو چند روز قبل پیش آنے والے حادثے کی تحقیقات کیلئے روسی ٹیم پاکستان آئے گی۔ 15 اگست کو ریلیف سرگرمیوں کے دوران ضلع مہمند میں تباہ ہونے والے خیبرپختونخوا حکومت کے ایم آئی 17 ہیلی کاپٹر کی تحقیقات جاری ہیں۔سرکاری ذرائع کے مطابق ایم آئی 17 ہیلی کاپٹر بنانے والی روسی کمپنی کے ماہرین کی ٹیم تحقیقات کیلئے پاکستان آئے گی جو پاکستانی ٹیم کے ساتھ مل کر کام کرے گی۔سرکاری ذرائع کا کہنا ہے کہ روسی ماہرین کی ٹیم بلیک باکس سمیت تباہ ہیلی کاپٹرکے پرزوں کا معائنہ کرے گی اور حادثے کی وجوہات جاننے کی بھی کوشش کرے گی۔

ذرائع کے مطابق تباہ شدہ ہیلی کاپٹر کے دو انجن اور گیئرباکس سمیت سیکڑوں کلو وزنی ملبہ تا حال جائے وقوعہ پر پڑا ہے، حکومت نے ملبہ منتقل کرنے کے لئے وفاق سے خصوصی ہیلی کاپٹر فراہم کرنے کی درخواست کی ہے کیونکہ وزنی پرزے اٹھانے کے لیے خصوصی ہیلی کاپٹرکی ضرورت ہے۔ذرائع کے مطابق تباہ ہونے والے ہیلی کاپٹرکی 2019 میں اوورہالنگ کی گئی تھی۔واضح رہے کہ 15 اگست کو ریلیف سرگرمیوں کے دوران ضلع مہمند میں سرکاری ہیلی کاپٹر کریش ہوگیا تھا جس میں دو پائلٹ سمیت عملے کے پانچ ارکان شہید ہوگئے تھے۔

کریڈٹ: انڈیپنڈنٹ نیوز پاکستان-آئی این پی