سینیٹ کی قائمہ کمیٹی برائے اقتصادی امور آج غیر ملکی این جی اوز کی سرگرمیوں کا جائزہ لے گی۔سیلاب زدگان کے لیے امداد اور فنڈز کے شفاف استعمال کا معاملہ بھی زیر غور آئیگا۔سیکرٹری داخلہ ،سیکرٹری خزانہ اور سیکرٹری خارجہ کو طلب کر لیا گیا۔تفصیلات کے مطابق سینیٹ کی قائمہ کمیٹی برائے اقتصادی امور کا اہم اجلاس آج بدھ کو دن گیارہ بجے پارلیمینٹ ہائوس کے کمیٹی روم نمبر چار میں سینیٹر فیصل سلیم رحمن کی صدارت میں ہوگا۔دو نکاتی ایجنڈے میں غیر ملکی این جی اوز کی سرگرمیوں کا جائزہ اورسیلاب زدگان کے لیے امداد اور فنڈز کے شفاف استعمال کا معاملہ شامل ہے۔وزارت داخلہ ،وزارت خارجہ اور وزارت خزانہ کے حکام کو غیر ملکی امداد سے چلنے والی تمام بین الاقوامی این جی اوز کا صوبائی اور ضلعی سطح پر ریکارڈ طلب کر لیا گیا ہے۔کمیٹی اس بات کا جائزہ لے گی کہ کوئی این جی او کسی غیر قانونی سرگرمی میں تو ملوث نہیں ہے ۔بین الاقوامی این جی اوز کی جغرافیائی کوریج اور ان کے جاری منصوبوں کا بھی تفصیلی جائزہ لیا جائیگا۔اجلاس میں سیلاب زدگان کے لیے امداد اور فنڈز کے شفاف استعمال کا معاملہ بھی زیر غور آئیگا اور این ڈی ایم اے کے چئیرمین کمیٹی کو فنڈز کی شفافیت کے بارے میں تفصیلی بریفنگ دیں گے،چاروں صوبوں کے ہنگامی امدادی اداروں سے بھی رپورٹس طلب کی گئیں ہیں۔اس کے علاوہ امدادی سرگرمیوں اور ریلیف میں ابتک کی غیر ملکی امداد کی صورتحال سے بھی کمیٹی کو آگاہ کیا جائیگا۔کمیٹی کے ممبران میں سینیٹراور لیڈر آف اپوزیشن ڈاکٹر شہزاد وسیم، سینیٹرنسیمہ احسان ، سینیٹرانور لال دین ، سینیٹرلیاقت خان ترکئی، سینیٹرشاہین خالد بٹ، سینیٹرعطاء الرحمن ، سینیٹرعمر فاروق، سینیٹرپلوشہ خان اور سینیٹر پرنس احمد عمر احمد زئی شامل ہیں۔اجلاس میں متعلقہ نگران وزراء کی شرکت بھی متوقع ہے۔

کریڈٹ: انڈیپنڈنٹ نیوز پاکستان-آئی این پی