خانیوال میں ایک نشے کا عادی اور جوئے کی لت کا شکار باپ اپنے دو بچے جوئے میںہار گیا۔ رپورٹ کے مطابق یہ دلخراش واقعہ پنجاب کے علاقہ خانیوال میں پیش آیا۔ جہاں اختر نامی شخص جو نشئی ہونے کے ساتھ جوئے کی لت کا عادی بھی تھا۔ اس شقی القلب کو جب جوئے میں لگانے کے لیے رقم نہ ملی تو اپنے دو کمسن بچوں کی بازی لگا کر انہیں جوئے میں ہار دیا۔بچوں سے محروم ہونے والی مظلوم ماں نے بتایا کہ کچھ لوگ اس کے بچے لینے آئے اور بتایا کہ اس کا شوہر جوئے میں ان بچوں کو ہار چکا ہے۔ میرے مزاحمت کرنے اور شور مچانے پر وہ لوگ دھمکیاں دیتے ہوئے واپس چلے گئے۔خاتون نے بتایا کہ صورتحال سے آگاہ کر کے اپنے والد کو بلایا تو شوہر نشے کی حالت میں گھر آیا۔ مجھ پر تشدد کر کے میرے بچے 3 سالہ عبدالرحمان اور 5 سالہ فیضان کو چھین کر لے گیا۔ ساتھ ہی ہمیں بھی گھر سے نکال دیا۔مظلوم ماں نے بچوں کی بازیابی کے لیے متعلقہ تھانے پہنچی اور درخواست دی تو پولیس حکام نے مبینہ طور پر رشوت طلب کی۔بچوں کے ماموں نے الزام عائد کیا ہے کہ بچوں کی بازیابی کے لیے تھانہ کہنہ میں درخواست دی تو تھانیدار رشوت طلب کر رہا ہے۔بچوں کی والدہ اور ماموں نے وزیراعلی مریم نواز اور آئی جی پنجاب سے اپیل کی ہے کہ بچوں کو شرابی اور جواری لوگوں کے قبضہ سے بازیاب کرایا جائے۔

کریڈٹ: انڈیپنڈنٹ نیوز پاکستان-آئی این پی